हलेसीन्युजडेस्क, खोटाङ/

खोटाङको सदरमुकाम नजिकै अवस्थित धार्मिक, सांस्कृतिक र पर्यटनको दृष्टिकोणले प्रशिद्ध कालिका भगवती मन्दिर क्षेत्रमा पुजा अर्चनाका साथै दर्शन गर्न र घुम्नका लागि समय सिमा तोकिएको छ । दिक्तेल रुपाकोट मझुवागढी नगरपालिकाले सार्वजनिक सूचना जारी गर्दै भदौ १ गतेबाट साँझ ७ बजेपछि हाटडाँडास्थित मुख्य प्रवेशद्धारबाट मन्दिर क्षेत्रमा प्रवेश गर्न रोक लगाइएको हो ।

सूचनामा वेलुकी ७ वजे अगाडि नै कोही प्रवेश गरेको भए पनि राती ८ बजेसम्म अनिवार्य रूपमा हाडडाँडास्थित गेटबाट बाहिर निस्किसक्नुपर्ने जनाइएको छ । यस्तै राति ९ बजेदेखि भने मन्दिर परिसरमा जडान गरिएका सबै बत्तीहरू बन्द गरिने व्यवस्था गरिएको नगर प्रवक्ता एवं वडा नः ५ का वडाध्यक्ष दिनेशकुमार घिमिरेले जानकारी दिनुभयो । कालीका भगवती मन्दिर जिल्लामा  मात्र नभई आसपासका जिल्लामा समेत पूजनीय स्थलका रूपमा परिचित छ । पुराना कथनअनुसार यहाँ पूजा गर्नाले मनोकामना पूरा हुने विश्वास गरिन्छ । त्यस्तै प्रशिद्ध त्रिधार्मिक स्थल हलेसीको दर्शन पछि कालिका भगवतीको दर्शन गर्नाले भक्तजनको मनोकांक्षा पूर्ण हुने पनि धार्मिक विश्वास छ ।

कालिका भगवती मन्दिर परिसरमा शौन्दर्यकरण गरिनुका साथै सन्ध्याकाल शुरु भएसँगै विभिन्न रंगिन बत्तिहरु झलमल बालिन थालेपछि थप आकर्षक गन्तव्यको रुपमा सो क्षेत्र परिचित हुन थालेको छ । विहानदेखि वेलुकी सम्म बाक्लो भक्तजन तथा दर्शनार्थीहरुका साथै दिक्तेल वरपरका मानिसहरु समेत उक्त क्षेत्रमा घुम्न जाने गर्दछन् ।

पछिल्लो समयमा यो क्षेत्रमा अनावश्यक भीडभाड, होहल्ला हुने गरेको गुनासो बढेपछि नगरपालिकाले शान्तिसुरक्षाका साथै अपृय घटना घट्न नदिनका लागि राती अवेरसम्म त्यहाँ मानिसको आवत जावतलाई रोक लगाइएको नगरपालिकाले जनाएको छ । यसका अतिरिक्त धार्मिक स्थललाई पवित्र राख्न, सुरक्षालाई सुदृढ गर्न र सौन्दर्यीकरणमा खर्च भएका संरचनाको संरक्षण गर्न यो कदम चालिएको  नगरप्रमुख तीर्थराज भट्टराईको भनाई छ । ऐतिहासिक मझुवागढी समेत रहेको यो क्षेत्रमा किराँत साँस्कृतिक पहिचान झल्कने विभिन्न संरचनाहरु समेत बनेका छन् । यस्तै कालीका भगवती मन्दिर तथा मझुवागढी पैदल जानका लागि प्रयोग हुने सिँढी आसपास विभिन्न प्रजातिका फूलहरु रोपेर आकर्षक उध्यानसहित रंगीन वातावरण सिर्जना गरिएको छ भने मन्दिर परिसरलाई व्यवस्थित पार्क जस्तो रूप दिइएको छ ।

नगरपालिकाको तर्फबाट तोकिएको समयले धार्मिक गतिविधि व्यवस्थित हुने, वातावरण स्वच्छ हुने र पवित्रता जोगिने अपेक्षा गरिएको छ । धार्मिक आस्था, सौन्दर्यीकरण र पर्यटन प्रबद्र्धनलाई जोड्दै कालीका भगवती मन्दिर क्षेत्रमा भित्रिने र बाहिरिने समय तोकिएको यो निर्णयलाई स्थानीयले समेत सकारात्मक रूपमा लिएका छन् ।

नगरपालिकाले गरेको यो पहलले खोटाङको गौरवमयी धार्मिक सम्पदा सुरक्षित हुनुका साथै धार्मिक पर्यटनलाई दीर्घकालीन रूपमा सम्वर्द्धन हुने विश्वास लिइएको छ । 

         नगरपालिकाद्धारा जारी गरिएको सूचना