हलेसीन्युजडेस्क, खोटाङ /

मध्यवर्षादको समयमा जिल्लाका अधिकांश कच्चि सडकहरु यातायातका लागि कष्टदायक छन् । एक ठाउँबाट अर्को ठाउँ जान ती सडकहरुमा वर्षादका कारण यात्रीहरुले ठूलो सास्ती र जोखिम मोल्नुपर्ने बाध्यता छ । यस्तो वेला स्वभाविक रुपमा ती यात्रुहरुले जिल्लाका नेतृत्वहरुलाई सामाजिक सञ्जाल या कुनै माध्यमबाट आलोचना गरेर चित्त बुझाउने गर्दछन् । तर खोटाङको साकेला गाउँपालिकाभित्र यात्रुहरुले हिउँद या वर्षादको समयमा छुट्टै अनुभव बटुल्ने गर्दछन् । यहाँका सडकहरुमा नियमित श्रमदानमार्फत सडकको भत्केको भाग मर्मत गर्ने, सडकको नालीहरु सफा गर्ने, झाडी बुट्यानहरु सफा गर्ने कामहरु भैरहन्छन् । यस्ता कामहरुको निरन्तरताले साकेला गाउँपालिकाभित्रका सडकहरु यात्रूका लागि सहज र सुविधाजनक रहेको स्थानीय बताउछन् ।

यही क्रममा साकेला गाउँपालिकामा सञ्चालन भईरहेको पूर्ण सरसफाई कार्यक्रम अन्तर्गत गाउँपालिका अध्यक्ष रवि प्रकाश राईको नेतृत्वमा श्रावण ३० गते श्रमदान मार्फत सडक मर्मत र सरसफाई गरिएको छ । अध्यक्ष राईको नेतृत्वमा ५० जनाभन्दा बढी गाउँपालिकामा कार्यरत कर्मचारी, मानेभन्ज्याङ बजारबासी, इलाका प्रहरी कार्यालय मात्तिमका प्रहरी र अन्य साकेलाबासी स्थानीय नागरिकहरुको सहभागितामा साप्सुखोला–मानेभन्ज्याङ–तावाभन्ज्याङ खण्डको नागढुङ्गादेखि बिर्ता जाने सडक पूर्ण रुपमा सरसफाई गरिएको हो ।

वर्षादका कारण सडकको भित्तामा थुनिएको नाली खोल्ने, सडकमा भएको फोहर व्यवस्थापन गर्ने, झोरझाडी हटाउने, खाल्डाखुल्डी पुर्ने लगायतका कामको लागि श्रमदान अभियान चलाईएको पूर्ण सरसफाई कार्यक्रम संयोजक सगुन बस्नेतले जानकारी दिनुभयो । पूर्ण सरसफाईमैत्री गाउँपालिका निर्माणको नीति अनुरुप यहाँको विभिन्न स्थानहरुमा श्रमदान मार्फत सरसफाईको विविध गतिविधिहरु सञ्चालन गरिँदै आईएको छ । 

बजार, पार्क, सडक तथा सार्वजनिक स्थलहरुमा सरसफाई गर्ने, खुल्ला तथा खाली स्थानहरुमा भुगोल र वातावरण सुहाउँदो विरुवाहरु रोप्ने, फोहरमैला संकलन तथा व्यवस्थापन गर्ने लगायतका गतिविधिहरु कार्यक्रम मार्फत सञ्चालन गरिँदै आईएको छ ।

गाउँपालिकाले सञ्चालन गर्ने संस्कार र सभ्यता, पूर्ण सरसफाई, आकस्मिक पूर्वाधार मार्फत गरिने विविध क्रियाकलापको नेतृत्व गाउँपालिका अध्यक्ष राई आफैले गर्दै आउनुभएको छ । कर्मचारी, स्थानीयवासी नागरिकहरुको उपस्थितिमा गरिने श्रमदान अभियानले संस्कार र सभ्यताको पहिचान साकेलाले दिएको जानकारहरु बताउँछन् ।

‘हामी साकेला गाउँपालिकालाई सफा र सुन्दर बनाउन प्रयत्नशिल छौं, गाउँपालिका सरकारले चालेको सरसफाईको अभियानलाई स्थानीय नागरिकहरुले स्वस्फूर्त रुपमा सहयोग गरिरहनुभएको छ ।’ अध्यक्ष राईले भन्नुभयो–‘पालिकाले गर्ने हरेक कार्यमा स्थानीयको साथ पाए समृद्ध साकेला बन्न धेरै समय लाग्दैन ।’

वर्षादका कारण भत्के विग्रेका सडकहरु पनि तत्काल स्थानीयवासीहरुको सहयोगमा गाउँपालिकाले मर्मत संभार गरी यातायात सुचारु गर्दै आएको अध्यक्ष राई बताउनुहुन्छ ।

जिल्लाका अन्य गाउँपालिकाले पनि यस्तो अभियान मार्फत आ–आफ्नो पालिकाभित्रका सडकहरुलाई नियमित मर्मत सुधार गर्न सके यात्रुहरुले ज्यानै जोखिम मोलेर यात्रा गर्नुपर्ने स्थिति नआउने जिल्लावासीको भनाई छ ।