हलेसीन्युजडेस्क, खोटाङ

खोटाङ जिल्ला कच्चि सडकको सञ्जालबाट जेलिएको छ । कुनै वेला यातायातको सुविधा पाउन उदयपुरको कटारी या गाइघाट पुग्नुपर्ने जिल्लावासी अब आफ्नै गाउँवस्तिमा जोडिएका सडकबाट यातायातको सुविधा पाउने भएका छन् ।

खोटाङबाट तराई होस या काठमाण्डौँ एकैदिनमा समय छदै जिल्लावासीहरु आफ्नो गन्तव्यमा पुग्ने भएकाछन् । तर ती सडकहरुको गुणस्तरीयतामा भने अझ पनि प्रगति हुन नसक्दा ती सडकहरुमध्ये करिव ७५ प्रतिशत सडक वर्षामा ठूला ठूला खाल्डो र खहरेजस्ता भड्खाला बन्ने गरेकाछन् । यो वर्ष पनि अझसम्म सडक स्तरोन्नतिका कामले तिव्रता पाइसकेको छैन । कतिपय कामहरु ठेक्का प्रकृयामा रहेको बताइन्छ । ठेक्का स्विकृत भएर फिल्डमा काम शुरु गर्दा नगर्दै वर्षादको प्रारम्भ हुने र ठेकेदारको ढिलासुस्ति सँगै कामले प्रगति लिन नसक्दा आगामी वर्षादको समय उसरी नै यातायात कष्टदायी बन्ने निश्चित देखिन्छ ।

यतिहुदा हुदै पनि जिल्लावासीहरु भइरहेका सडकको विकल्पमा तराइसँग जोड्ने छिटो र छोटा सडकहरुको खोजिमा पनि लागिरहेकै छन् । जिल्लाको सदरमुकाम दिक्तेलवजारदेखि तराई जोड्ने सडकहरुमा अत्यन्त छोटो दुरि मानिने दिक्तेल–खानिडाँडा–रेग्मीटार खण्डको कच्चि सडक सञ्चालन योग्य बनेपछि यसको परिक्षण पनि गरिएको छ ।

जिल्ला विकास समिति अस्तित्वमा रहदै २०७२÷७३ सालताका उक्त सडक खण्डको ट्रयाक खोल्ने काम शुरु भएको थियो । दिक्तेलबाट गाइघाट जाँदा मौरे–बुइपा–राजापानी भएर जानुपर्दा यात्रा निकै लामो र घुमाउरो भएको ठहर गर्दै जिल्ला विकासको आयोजनामा त्यो वेला सर्वदलीय बैठकले दिक्तेल–खानीडाँडा–आहाले हुदै रेग्मीटार जोड्न सके करिव डेढ दुइघण्टा समय बच्ने निष्कर्षमा उक्त सडक खण्डको काम प्रारम्भ भएको थियो । 

तर साप्सुखोलास्थित नयाँवस्ति देखि उताको भाग ठाडो भिर र चट्टानी भूभागबाट बनेकोले सिमित वजेटमा  सडक खन्ने कामले द्रुतता पाउन सकेन । सोही अवस्थामा साप्सुखोला दिखुवादोभानमा हाइड्रो पावरको काम शुरु भएपछि त्यहाँबाट राजापानी(पुराना गाउँ) हुदै गाइघाट–दिक्तेल सडकसम्म हाइड्रोपावरले सडक निर्माण गरेपछि दिक्तेल–आहाले हुदै दिखुवादोभान–राजापानी(पुराना गाउँ) भएर रेग्मीटार जाने सडकको सम्भावना बढेर गयो । तत्पश्चात दिक्तेलरुपाकोट मझुवागढी नगरपालिकाले रु ४७ लाख वजेट विनियोजन गरेर आहाले दिखुवादोभानको ट्रयाकलाई स्तरोन्नतिको काम शुरु ग–यो । यो आ.व.मा पनि रु २० लाख विनियोजन गरेर स्तरोन्नतिको कामलाई निरन्तरता दिइरहेको नगरपालिका श्रोतले जनाएको छ । उपभोक्ता समितिमार्फत स्तरोन्नतिको काम गरिएको उक्त सडकमा उपभोक्ता समितिले रु ६ लाख ७९ हजार ७२१ बराबरको श्रमदान गरेका छन् ।

खानीडाँडा–आहाले–दिखुवादोभानबाट सिधै रेग्मीटार जोड्नका लागि प्रदेश सरकारसँग गौरवको आयोजनामा राखिदिन अनुरोध भैरहेको नगरपालिकाले जनाएको छ । यसका लागि चालू आ.व.मा प्रदेश सरकारबाट रु ८० लाख वजेट विनियोजन भएको जनाइएको छ । 

माघ २९ गते सोही सडक दिक्तेलदिक्तेलरुपाकोट मझुवागढी नगरपालिका–४ खाल्लेका ९५ वर्षीय नन्दलाल ढुङ्गानाले रिवन काटेर उद्धघाटन गर्दै परिक्षणका रुपमा दुईवटा बस गुडाएसँगै नियमित यातायात सञ्चालनको तयारी भैरहेको यातायात व्यवसायी बताउछन् ।

उक्त दिन जिल्लाको प्रमुख व्यापारिक केन्द्र दिक्तेल बजारबाट बस लिएर आहाले पुगेका चालक र सहचालकलाई खाल्लेबासीले अबिर र खादाले धुमधामसँग स्वागत गरेका थिए । चालक र सहचालकलाई स्वागत गरेपछि आहालेमा आयोजित कार्यक्रममा स्थानीयवासीहरुका साथ उपस्थित सबैले उधुमले खुशी प्रकट गरे, नाँचे, गाए, रमाए ।

खाल्लेस्थित आहालेबाट दिखुवाफेदीसम्मको सडक स्तरोन्नति गरेपछि पुरानोगाउँ हुँदै रेग्मीटारसम्म नियमित बस सञ्चालन गर्ने तयारीस्वरुप परीक्षण गरिएको खोटाङ यातायात प्रा.लि.का महासचिव रामकुमार हिङमाङले जानकारी दिनुभएको छ । 

यो सडक सञ्चालन भएपछि सदरमुकाम दिक्तेलवजारदेखि तराई जाने सबैभन्दा छोटा मार्ग खोलिनेछ । दिक्तेल–खानीडाँडा–पुरानोगाउँ हुँदै रेग्मीटार साढे ३१ किलोमिटरमात्र छ । तर दिक्तेल मौरे रेग्मीटार सडकको दुरि ५९ किमि रहेको छ । जुन अब सञ्चालनमा ल्याइने दिक्तेल–खानीडाँडा–आहाले–रेग्मीटार सडकभन्दा साढे १७ किलोमिटर वढी दुरि रहेको छ ।
यता, दिक्तेल–खानीडाँडा सडक पनि भर्खरैबाट पुनः कालोपत्रको काम थालिएको छ । राष्ट्रिय पुनः निर्माण प्राधिकरणको रु २१ करोड एक लाख ८८ हजार लगानीमा कालोपत्रको काम थालिएको सो सडक ठेकेदारको लापरबाहीले करिब डेढ वर्ष अलपत्र अवस्थामा थियो ।

ठेकेदार कम्पनी याक्थुङहाङ÷साप÷सिरुवा जेभीले वि.सं. २०७६ चैत–७ गतेभित्र सम्पन्न गर्नेगरी निर्माणको जिम्मा लिएको उक्त सडक सम्झौता अवधि गुज्रिएपछि थप भएको समय पनि वि.सं. २०७८ वैशाख–२९ गते सकिएको छ । चौतर्फी विरोध र दवाव सिर्जना भएपछि पछिल्लोपटक अलपत्र अवस्थामा रहेको दिक्तेल–खानीडाँडा सडक खण्ड अन्तर्गत हाटडाँडाको ढलानको काम सकेर बाँकी कामहरु डे«न वालको काम भैरहेको छ । योसँगै कालोपत्रेको काम हुने जनाइएको छ ।