हलेसीन्युजडेस्क, खोटाङ /

नेपालीहरुको महत्वपूर्ण पर्व दशै समापन भएसँगै अर्को मुख्य पर्व तिहार नजिकिइरहेको छ । गाउँघरमा हर्ष र खुशीयाली छाइरहेको देखिन्छ । यस्तै अवसरमा खोटाङको दिक्तेल रुपाकोट मझुवागढी नगरपालिका–१२ जाल्पामा स्थानीयवासीले आ आफ्नो तर्फबाट श्रमदानमार्फत स्थानीय सडक मर्मत गरिरहेका छन् । गएको वर्षातका कारण क्षत विक्षत भएर यातायातका लागि कष्टदायक बनिरहेका स्थानीय ग्रामिण सडकहरुको यहीँ अवसरमा जालपावासीले श्रमदान मार्फत कात्तिक ८ गते विहीवार देखि सडक मर्मतको काम गरिरहेको वडा नम्बर–१२ जालपाका  वडाध्यक्ष  दान बहादुर रार्ईले हलेसी एफ एमलार्ई जानकारी दिनु भएको छ ।  

वडा कार्यालयको अगुवाइमा  विहीवारदेखि शनिवार सम्म तीनदिन सडक मर्मतको काम गरिने वडाध्यक्ष राई बताउनुहुन्छ । स्थानीय गाउँलेहरु, वडाका जनप्रतिनिधिहरु, स्थानीय विध्यालयका शिक्षक, बिध्यार्थीहरु बिभिन्न सघं संस्थाका प्रतिनिधिहरु करिव सयजनाको हाराहारीमा श्रम अभियानमा जुटिरहनु भएको जनाइएको छ । 

सडक अवरुद्ध भएपछि स्थानीयवासीको सक्रियतामा श्रमदान गरेर बाटो मर्मत गर्ने, हिलो भएको स्थानमा ढुङ्गा बिछ्याउने, सडकको नाली कटाउने लगायत काम भैरहेको  वडाध्यक्ष रार्ई बताउनु हुन्छ । वडा कार्यालयको अनुरोध तथा स्थानीयवासीको सक्रियतामा जाल्पा बजारबाट  छिमेकी गाउँ खार्मी जाने बाटोको लमर्खु  खोलासम्मको सडक मर्मतको काम भैरहेको उहाँले बताउनु भयो । श्रमदानमार्फत विभिन्न सडक मर्मतसँगै सरसफाइको काम समेत भइरहेको छ  ।

हामीलाई वडाध्यक्ष राई बताउनुुहुन्छ–‘ हिजोदेखि श्रमदानमार्फत सडक मर्मतसँगै विभिन्न काम गर्दै आएका छौँ । गएको वर्षातको समयमा गाउँको सडक बिग्रिएर आवतजावतमा समस्या भैरहेको कारण वडाको अगुवाइमा श्रमदान अभियान सञ्चालन गरिरहेका छौँ । यो अभियान कार्तिक १० गते सम्म ३ दिन गरिनेछ ।’ उहाँले थप्नुभयो–‘सबै काम वडाको सीमित बजेटले गर्न सम्भव नभएपछि हामीले श्रमदान अभियान सञ्चालन गरिरहेका छौँ ।’ 

जालपाले विगत लामो समयदेखि नै स्थानीय विकास निर्माणमा श्रमदान अभियानलाई श्रम सँस्कृतिको रुपमा निरन्तरता दिदै आइरहेको छ ।