हलेसीन्युजडेस्क, खोटाङ/

खोटाङको दिक्तेल रुपाकोट मझुवागढी नगरपालिकाले सामुदायिक विध्यालयहरुमा जीवनोपयोगी शिक्षा अभियान शुरु गरेको छ । पन्ध्र वडा रहेको यो नगरपालिकाले हरेक मंगलवार नगरपालिका क्षेत्रमा रहेका सामुदायिक विध्यालयहरुमा यो अभियान सञ्चालन गर्न थालेको हो ।

यही अभियान अन्तर्गत जेष्ठ १ गते मंगलवारका दिन वडा नं. ४ खाल्लेस्थित शितला माविका विध्यार्थी र शिक्षकहरु विध्यालय परिसरमा रहेको खालि जमिनमा केरा र लिचि रोप्ने तयारीमा जुटेकाछन् । कक्षा ६ देखि १० सम्मका विध्यार्थीहरु र सबै शिक्षकहरु सहभागी भएर विध्यालयको नाममा रहेको १५ रोपनी जग्गाक्षेत्रअन्तर्गत सदुपयोगमा नरहेको जमिनमा झाडी वुट्यानहरु सफा गरिएको छ । 

वर्षादको समय शुरु भएको अवसर पारेर यो जमिनमा केरा र लिचिको विरुवा रोपी त्यसको उचित संरक्षण गरेर विध्यालयको आम्दानीको श्रोतमा टेवा पुराउने सोँचले पाठ्यपुस्तकविहिन जीवनोपयोगी शिक्षा अन्तर्गत आज देखि जमिनलाई सदुपयोग गर्न शुरु गरिएको शिक्षक मिनकुमार दाहाल बताउनुहुन्छ । 

उहाँका अनुसार उपयोगविहिन अवस्थामा रहेको यी जमिनमा ऐँसेलु र वनमाराका वाक्लो झाडी रहेको हुँदा पहिलो चरणमा ती सबै सफा गरेर त्यसलाई नष्ट गरी जमिनलाई विरुवा रोप्न लायक बनाइनेछ । अनि कुन कुन प्रजातीका केरा, लिचि र त्यसका विरुवाहरु कसरी जुटाउने भन्ने योजना बनाइनेछ, त्यसपछि मौसम अनुकूलतालाई हेरेर तिनिहरुलाई दूरि मिलाएर रोपिनेछन् । उहाँ थप्नुहुन्छ–‘त्यसवीच मलजलको उचित प्रवन्ध गरिनेछ र यो कार्यक्रमलाई अभियानका रुपमा निरन्तर अगाडि बढाइने छ ।’

विक्रम सम्वत २०१८ सालमा स्थापना गरिएको यस विध्यालयमा सबैतहका गरी १३ जना शिक्षकहरु कार्यरत हुनुहुन्छ भने अन्य २ जना कार्यालय सहयोगीका रुपमा कार्यरत हुनुहुन्छ । विध्यालय श्रोतका अनुसार विध्यालयमा १३० जना विध्यार्थीहरु अध्ययनरत छन् । विध्यालयको भौतिक पूर्वाधारमा जोड दिन जरुरी रहेका श्रोतको भनाई छ ।