हलेसीन्युजडेस्क, खोटाङ/

भाद्र २२ / खोटाङ जिल्लामा पहिलो पटक जिल्लास्तरीय क्यारामबोर्ड प्रतियोगिता सञ्चालन हुने भएको छ । नजिकिरहेको महत्वपूर्ण पर्व विजया दशमी—२०८२  को अवसरमा जिल्लाका युवाहरूलाई खेलकुदतर्फ प्रेरित गर्ने उद्देश्यले न्यू जेनेरेशन युवा क्लबको आयोजनामा प्रतियोगिता हुन लागेको हो ।

प्रतियोगिता दिक्तेलस्थित माटिकोरे कभर्डहलमा असोज ४ गते विहान १० बजेबाट सुरु हुने आयोजकले जनाएकोे छ ।

प्रतियोगिता जिल्लाभरिका क्यारामबोर्ड प्रेमीहरूलाई लक्षित गरी आयोजना गरिएको  न्यू जेनेरेशन युवा क्लबका अध्यक्ष जमान सिं तामाङले हलेसी एफ एमलाइ जानकारी दिनुभएको छ ।  जिल्लामा पहिलोपटक औपचारिक रूपमा सञ्चालन हुन लागेको क्यारेमबोर्ड प्रतियोगितले खेल क्षेत्रमा नयाँ ढोका खोल्ने अपेक्षा गरिएको क्लबका सचिव दिपेश हिङमाङले बताउनु भयो ।

प्रतियोगितामा सहभागी हुन चाहने खेलाडीहरूले रु.३ हजार दर्ता शुल्क बुझाउनुपर्नेछ । प्रतियोगिता खुला रूपमा सञ्चालन गरिने भएकाले जिल्लाका कुनै पनि स्थानका इच्छुक खेलाडीहरूले सहभागिता जनाउन सक्ने जनाइएको छ ।

आयोजकका अनुसार, प्रतियोगितामा पहिलो स्थान प्राप्त गर्ने खेलाडीलाई नगद रु.४० हजार, दोस्रो हुनेलाई रु.२० हजार र तेस्रो स्थान हासिल गर्ने खेलाडीलाई रु.१० हजार नगद पुरस्कारका साथ सबै विजेताहरुलाई कप तथा प्रमाणपत्र प्रदान गरिने छ, ।

स्थानीय युवा तथा खेलप्रेमीहरूमा प्रतियोगिता प्रति उत्साह देखिएको आयोजकको कथन छ । स्थानीय सामुदायिक रेडियो हलेसी एफ एमबाट समेत सबै खेलाडीहरुलाई सूचना सम्प्रेषण होस भन्ने ध्येयले प्रतियोगिताको सूचना प्रसारण भइरहेको छ । क्लबले प्रतियोगितालाई सफल बनाउनको लागि विभिन्न स्थानीय संघ-संस्था तथा व्यवसायीहरूसँग समन्वय गरिरहेको बताइन्छ।

यस किसिमको प्रतियोगिता जिल्लामा पहिलो पटक आयोजना हुन लागेको हुँदा यसले क्यारामबोर्ड जस्तो इनडोर गेमलाई व्यावसायिक एवं प्रतिस्पर्धात्मक बनाउने अपेक्षा गरिएको छ । साथै, खेलाडीहरूलाई आफ्ना सीप प्रस्तुत गर्ने राम्रो अवसर समेत प्राप्त हुने आयोजकको विश्वास रहेको बताइन्छ ।