हलेसीन्युजडेस्क, खोटाङ /

खोटाङको दिक्तेलवजारस्थित समिक्षालय हलमा खोटाङ संगीत कला घरले एकांकी नाटक प्रदर्शन शुरु गरेको छ । कक्षा १० को नेपाली पाठ्यपुस्तकमा समावेश गरिएको प्रख्यात साहित्यकार भीमनिधि तिवारीद्वारा लिखित एकांकी नाटक ‘घरको माया’लाई भाद्र ७ गतेदेखि औपचारिक रूपमा मञ्चन सुरु गरिएको हो । नाटकका सर्जक भिमनीधि तिवारी नेपाली साहित्यमा नाटक, कथा, कविता र निबन्ध लेखनमार्फत समाज परिवर्तनका पक्षिधर मानिन्छन् ।

नाटक हेरिसके पछि हरेक नेपालीलाई देश बाहिर रहेर भोगिने अनुभव र त्यो वेला आफ्नो जन्मभूमिको माया र महत्वलाई अन्तरहृदयले अनुभूति गराउन कलाकारहरु सफल रहेका दर्शकहरुको प्रतिकृया छ । नाटकले पर्देशिएका दाजुभाई दिदीबहिनीहरुलाई स्वदेशमै फर्किन शन्देस दिने संगीत कला घरका निर्देशक कृष्ण प्रसाद आचार्यले हलेसी एफएमलाई बताउनुभयो ।

एकांकी नाटक कार्यक्रमको उद्घाटन दिक्तेल रुपाकोट मझुवागढी नगरपालिकाका उपप्रमुख वीसन राईले गर्नुभयो । उद्घाटन कार्यक्रममा बोल्दै उपप्रमुख राईले साहित्य, कला र संस्कृतिको संरक्षण र प्रवर्द्धनमा युवापुस्ताले देखाएको चासो प्रशंसनीय रहेको बताउनुभयो । उहाँले विद्यालय स्तरमै साहित्यिक तथा सांस्कृतिक चेतना फैलाउन यस्ता प्रस्तुति महत्वपूर्ण हुनेमा जोड दिनुभयो ।

खोटाङ संगीत कला घरका निर्देशक आर्चायका अनुसार एकांकी नाटक आगामी भदौ ११ गतेसम्म निरन्तर सञ्चालन हुनेछ । उहाँका अनुसार नाटक दैनिक बिहान, दिउँसो र बेलुकी गरी तीन पटक प्रदर्शन गरिनेछ ।

नाटकको उद्घाटनका अवसरमा जिल्लाका विभिन्न राजनीतिक दलका प्रतिनिधिहरु, शिक्षक–विद्यार्थी, साहित्यप्रेमी, कलाकार तथा सर्वसाधारणको उल्लेखनीय उपस्थिति रहेको थियो । नाटक हेरेपछि अधिकांश दर्शकले शैक्षिक पाठ्यक्रममा समावेश साहित्यलाई मञ्चनमार्फत जीवन्त बनाउन गरिएको प्रयास प्रशंसनीय भएको प्रतिक्रिया दिनुभएको छ ।

नाटक मञ्चनमार्फत विद्यार्थी तथा अभिभावकमा साहित्य लेखनमार्फत राष्ट्रभक्तिको भाव जागृत गराउने, साहित्यिक चेतना जगाउने, अभिनयकला र संस्कृतिप्रतिको आकर्षण बढाउने तथा स्थानीय प्रतिभालाई प्रोत्साहन गर्ने उद्देश्य राखिएको खोटाङ संगीत कला घरका सचिव गुरु प्रसाद ढकालले बताउनु भयो ।

उद्घाटन सत्रमा प्रमुख अतिथिसहितका वक्ताहरुले साहित्य र कलाको संगममार्फत समाजमा सकारात्मक सन्देश प्रवाह गर्न सकिने भएकाले यस्ता कार्यक्रमलाई निरन्तरता दिनुपर्नेमा जोड दिएका थिए ।

खोटाङ संगीत कलाघरका अध्यक्ष पदम हिङ्गमाङको अध्यक्षतामा भएको उद्घाटन कार्यक्रमकोे सञ्चालन खोटाङ संगीत कला घरका सचिव गुरुप्रसाद ढकालले गर्नुभएको थियो भने एकांकी नाटकको निर्देशन सुजन आचार्यले गर्नु भएको थियो ।