“प्रदेश सरकारद्धारा ५० सैयाको अस्पताल घोषणा, तर सेवा प्रवाहमा भने सुधार नहुनु विडम्वना’’-नगरप्रमुख भट्टराई

हलेसीन्युजडेस्क, खोटाङ/

खोटाङको दिक्तेल रुपाकोट मझुवागढी नगरपालिकाले जिल्लाको सदरमुकाममा रहेको जिल्ला अस्पतालको नयाँ भवन अलपत्र पारिएको भन्दै निर्माण व्यवसायीविरुद्ध कडा कदम चाल्ने चेतावनी दिएको छ । सोमबार (भाद्र ९) दिक्तेल अस्पताल परिसरमा पत्रकार सम्मेलन गर्दै नगर प्रमुख तीर्थराज भट्टराईले सदरमुकाममा रहेको एकमात्र ५० सैयाँको अस्पताल नयाँ भवन निर्माणको काम अलपत्र छाडिँदा गुणस्तरीय स्वास्थ्य सेवाबाट जिल्लावासी बञ्चित हुनुपरेकोमा कडा आपत्ति जनाउदै सम्बद्ध पक्षको ध्यानाकर्षण गराउनु भएको हो ।

                                जिल्ला अस्पतालको निर्माणाधिन भवन

२०७८ असार २४ गते अस्पताल भवनको ठेक्का सम्झौता गरी निर्माण कार्यको जिम्मा लिएको रामसागर/श्यामसुन्दर/नेपाल फुलबारी जे.भी कम्पनीले हालसम्म २ पटक म्याद थप गरिसक्दा पनि २०८१ फागुन २७ गते अन्तिम समय सिमाभित्र समेत काम सम्पन्न नगरी निर्माण कार्य अपूरा छाडेर बेपत्ता भएको नगरप्रमुख भट्टराईको आरोप थियो । उहाँले कम्पनीका प्रतिनिधिको खोजीका लागि सूचना प्रकाशन गर्ने र फोटोसहित सार्वजनिक स्थलमा टाँस्ने निर्णय समेत भएको जानकारी दिनुभयो ।

नगरपालिकाले पटक–पटक आग्रह गर्दा पनि भवन निर्माण अघि नबढ्दा जनस्वास्थ्यको सेवा प्रवाहमा गम्भीर असर परेको भन्दै चिन्ता व्यक्त गरिएको छ । भवन अधुरो रहँदा उपचार कक्ष, शौचालय, सरसफाइ लगायत आधारभूत पूर्वाधार अभावमा सेवाग्राहीले ठूलो समस्या भोग्नुपरेको नगरपालिकाको भनाइ छ ।

यसअघि जिल्ला समन्वय समिति, प्रमुख जिल्ला अधिकारी, राजनीतिक दलका प्रतिनिधि, स्वास्थ्य संस्था र सरोकारवालाको उपस्थितिमा भएका छलफल र सम्झौताहरू समेत कार्यान्वयन नभएको भन्दै नगरपालिकाले असन्तोष प्रकट गरेको छ ।

पत्रकार सम्मेलनमार्फत नगरपालिकाले सम्बन्धित निर्माण व्यवसायीलाई ७ दिनभित्र कार्यतालिका बनाई नगरपालिकामा उपलव्ध गराउने र सोही अनुसार तोकिएको समयमा काम सम्पन्न गर्न अनुरोध गर्ने र सो समयमा काम सम्पन्न नगरिएमा सम्बन्धित निर्माण व्यवसायीलाई कानूनी कारबाहीको दायरामा ल्याउनुपर्नेमा जोड दिएको छ ।

नगर प्रमुख भट्टराईले चेतावनी दिँदै भन्नुभयो-“यदि तोकिएको वर्क शेड्युल अनुसार बाँकी काम अघि बढाइएन भने नगरपालिका र यहाँका जनताले नागरिकको जीवन रक्षाका लागि आन्दोलनात्मक कार्यक्रमलाई अगाडि बढाउन बाध्य हुनेछ ।” उहाँले असन्तुष्टि व्यक्त गर्दै हलेसी एफएमलाई भन्नुभयो-‘‘प्रदेश सरकारद्धारा ५० सैयाको अस्पताल घोषणा भएको छ, तर सेवा प्रवाहमा भने सुधार हुन नसक्नु जिल्लावासीका लागि ठूलो विडम्वना हो ।’’ सामान्य रोगका विरामीहरु समेत हेलिकप्टर चार्टर गरेर जिल्ला बाहिर उपचारका लागि जानुपर्ने बाध्यताप्रति उहाँको असन्तुष्टि लक्षित थियो ।

यस्तै जिल्ला अस्पताललाई सञ्चालनमा ल्याउन र सेवाको गुणस्तर सुधार गर्न नगरपालिका–स्तरमै सशक्त सरोकारवाला समिति गठन गर्ने, जनचेतनामूलक अभियान सञ्चालन गर्ने र नियमित सरोकारवाला बैठक राख्ने निर्णय गरिएको छ ।

पत्रकार सम्मेलनमा नगर प्रमुख भट्टराईसँगै स्थानीय जनप्रतिनिधि, विभिन्न राजनीतिक दलका प्रतिनिधि, स्वास्थ्यकर्मी तथा पत्रकारहरूको उपस्थिति थियो ।

पत्रकार सम्मेलन अगाडि निर्माणाधिन भवनको अवलोकन गरिएको थियो ।