हलेसीन्युजडेस्क, खोटाङ /

भाद्र १६ / खोटाङको केपिलासगढी गाउँपालिका, वडा नं. २, खार्तम्छामा स्थानीय मामातिम युवा क्लबले आगामी अशोजको अन्तिम हप्तामा वडा स्तरीय खुल्ला पुरुष भलिबल प्रतियोगिताको आयोजना गर्ने भएको छ । क्लबले २०८२ सालको विजयादशमी, दीपावली तथा छठ पर्वको विशेष अवसर पारेर असोज २५ गतेदेखि २९ गतेसम्म वडा स्तरीय खुल्ला पुरुष भलिबल प्रतियोगिताको आयोजना गर्ने भएको हो ।

प्रतियोगिताले स्थानीय खेलाडीलाई खेलकुदमा सक्रिय बनाउने र चाडपर्वको अवसरमा मनोरञ्जनको माध्यम प्रदान गर्ने लक्ष्य राखेको आयोजकको कथन छ । 
प्रमुख सल्लाहकार अबिशेक राईका अनुसार, प्रतियोगिता पोल सिस्टम अनुसार हुनेछ र प्रत्येक टिमका खेलाडी एउटै वडाबाट हुनुपर्नेछ । जर्सी अनिवार्य रहेको छ भने बसाइ, खानेकुरा र अनुशासनको जिम्मेवारी खेलाडी आफैंले लिनुपर्नेछ ।

प्रतियोगितामा सहभागिताका लागि दर्ता शुल्क रु.३ हजार ५सय रुपैयाँ तोकिएको छ । इच्छुक टिमहरूले असोज २४ गते दिउँसो ३ बजेसम्म दर्ता गरिसक्नुपर्नेछ । फोनमार्फत पनि टिम दर्ता गर्न सकिने भए पनि दर्ता शुल्क भने खेल शुरु हुनु अगाडि नै बुझाइसक्नु पर्ने जनाइएको छ।

खेल आकर्षक र रोमाञ्चक हुने आयोजकको विश्वास छ । विजेताहरूमा प्रथम हुने टोलीले रु.५० हजार रुपैयाँ, ट्रफी, मेडल र प्रमाणपत्र पाउनेछ भने द्वितीय टोलीले रु.३५ हजार रुपैयाँसहित ट्रफी र मेडल र प्रमाणपत्र पाउनेछ । सेमिफाइनलमा पुगेका टोलीहरूलाई १२–१२ हजार रुपैयाँ पुरस्कार तथा प्रमाणपत्र प्रदान गरिने आयोजकले जनाएको छ ।

खेलमा उत्कृष्ट प्रदर्शन गर्ने खेलाडीलाई रु.१ हजार रुपैयाँसहित ट्रफी, मेडल र प्रमाणपत्र प्रदान गरिनेछ । उत्कृष्ट सर्टर, ब्लकर, स्पाइकर, डिफेन्डर, सर्भर, अनुशासित खेलाडी र बेस्ट कोचले जनही रु.५सय रुपैया पुरस्कार पाउनेछन् ।

प्रतियोगिता केपिलासगढी गाउँपालिका वडा नं. २, खार्तम्छा स्थित मामातिम युवा क्लबको खेलमैदान, तेमाखामा सञ्चालन हुनेछ ।

थप जानकारीका लागि सम्पर्क व्यक्तिः

अबिशेक राई – ९८६३७३८५०२
देउराज राई – ९७४६२१२१२२
सरोज राई – ९८६१७३२५९०
ईन्जु राई – ९८६९८०८०२७