हलेसीन्युजडेस्क, खोटाङ /

खोटाङमा बैशाख ३१ गतेबाट शुरु भएको बृहत खोटाङ-हलेसी खेलकुद, साहित्यिक, सांगीतिक, पर्यटन महोत्सव–२०८१ समापन भएको छ । अन्तिम चरणमा राष्ट्रिय कराते प्रतियोगिताको प्रदर्शनसँगै जेष्ठ १० गते महोत्सव समापन भएको हो ।

महोत्सवको अन्तिम श्रंखलामा भएको राष्ट्रिय कराते प्रतियोगिताको उपाधि आयोजक टिमले चुमेकोे छ । दिक्तेलको माटिकोरे कभर्डहलमा सम्पन्न भएको राष्ट्रिय कराँते प्रतियोगितामा आयोजक नेपाल खेलकुद प्रतिष्ठानले आठ स्वर्ण, चार रजत र दुई कास्य पदकसहित रु एक लाख ११ हजार १११ राशीको प्रथम पुरस्कार हात पार्दै उपाधि चुम्न सफल भएको छ ।

यस्तै तीन स्वर्ण, दुई रजत, सात कास्य ल्याएर दोश्रो बनेकोे बाग्मती प्रदेशले रु. ५५ हजार ५५५, दुई स्वर्ण, एक रजत, चार कास्य ल्याएर तेश्रो बनेको गण्डकी प्रदेशले रु.४४ हजार ४४४ र एक स्वर्ण, सात रजत, चार कास्य ल्याएर चौथो बनेको कोशी प्रदेशले रु.२२ हजार २२२ रुपैयाँसहित ट्रफि र प्रमाण पत्र प्राप्त गरेका छन् ।

सुदुरपश्चिम प्रदेश, मधेश प्रदेशले एक–एक स्वर्णका हकदार हुँदा कर्णाली प्रदेश र लुम्बिनी प्रदेश भने स्वर्ण पदकबाट बञ्चित रहन पुगे ।

प्रतियोगितामा महिलातर्फ सुदुरपश्चिम प्रदेशकी गरिमा मल्ल तथा पुरुषतर्फ आयोजक टोलीका रुरीहाङ दुमी राई सर्वोत्कृष्ट खेलाडि घोषित भएकाछन् । सर्वोत्कृष्ट खेलाडी गरिमा र रुरीहाङले जनही नगद रु २२ हजार २२२ को साथमा शिल्ड, मेडल र प्रमाणपत्र प्राप्त गरेकाछन् ।

प्रतियोगितामा सातवटा प्रदेश र आयोजक गरी आठ टिमले प्रतिस्पर्धा गरेका थिए । 

तीन दिनसम्म सञ्चालन भएको कराँते प्रतियोगितामा उत्कृष्ट व्यवस्थापनमा मधेश प्रदेश घोषित भएको छ । उत्कृष्ट व्यवस्थापन गर्ने मधेश प्रदेशलाई रु एघार हजार १११ नगदसहित ट्रफी, मेडल र प्रमाणपत्र प्रदान गरिएको महोत्सवको व्यवस्थापकीय भूमिकामा रहेको सितोरियो कराँते सङ्घ खोटाङका अध्यक्ष मिलन कसजुले बताउनुभयो ।

प्रतियोगिताका विजयी खेलाडी तथा टिमलाई प्रदेश खेलकुद विकास बोर्ड कोशी प्रदेशका सदस्य सचिव कृष्ण बस्नेत ‘पर्शुराम’ले पुरस्कार वितरण गर्नुभएको थियो । कार्यक्रम समापनका अवसरमा अतिथिहरुले महोत्सवको सह्राहना गर्नुभएको थियो ।