हलेसीन्युजडेस्क, खोटाङ /

खोटाङ दिक्तेलवजारका अग्रज समाजसेवी चित्रकुमार वजिमयको आज ७९ वर्षको उमेरमा निधन भएको छ । विक्रम सम्बत २००१ साल मंसिर १२ गते पिता स्वर्गीय बुद्धिकुमार वजिमय र माता कृष्णकुमारीको सुपुत्रका रुपमा जन्मिनुभएका स्वर्गीय वजिमयको केही समयदेखि अस्वस्थ्य भै उपचारको क्रममा आज विहान ७.४५ वजे काठमाण्डौँ, गोठाटारस्थित आफ्नै निवासमा निधन भएको पारिवारिक श्रोतले जनाएको छ ।

लामो समय नेपाल सरकारको सेवामा रही २०४८ सालमा सेवा निवृत्त हुनुभएपछि जीवनको बाँकी समय समाज र समुदायको हितमा लाग्नुभएका स्वर्गीय वजिमय दिक्तेल वजार सामाजिक गठीको संस्थापक अध्यक्ष हुनुहन्थ्यो । नेपाल रेडक्रस सोसाइटीको जिल्ला सदस्य समेत भएर लामो समय रेडक्रसकर्मीका रुपमा मानवीय सेवामा समेत समर्पित रहनु भएको वजिमय राजनैतिक रुपमा नेपाली कांग्रेससँग सम्बद्ध हुनुहुन्थ्यो । 

उहाँको घरमा जिल्लाका नेतृत्वहरु अप्ठ्यारो अवस्थामा  सहारा लिई बस्ने गरेको नेपाली कांग्रेसका जिल्ला सभापति विष्णुकुमार राई बताउनुहुन्छ । खोटाङका नेता तथा पूर्व वनराज्य मन्त्रि शिवकुमार बस्नेत, नेता स्वर्गीय कालुमान गुरुङ लगायतले उहाँको अभिभावकत्वमा अप्ठ्यारो परिस्थिति बिताएको सभापति राई भन्नुहुन्छ ।

निडर, हकी र निस्वार्थ स्वभावका स्वर्गीय बजिमय पछिल्लो समय शारीरिक अस्वस्थ्यताका कारण काठमाण्डुमा रहेर उपचार गराइरहनुभएको थियो । उहाँको निधनबाट खोटाङले जिम्मेवार समाजसेवी गुमाएको छ । 

आजै पशुपती आर्यघाटमा उहाको पार्थिव शरीरमा नेपाली कांग्रेस खोटाङका सभापति विष्णुकुमार राई र खोटाङ काठमाण्डौ सम्पर्क समितिका अध्यक्ष काशीनाथ आचार्यले कांग्रेसको झण्डा ओढाएर एक मिनेट मौन धारण गरी सम्मान प्रकट गरिएको थियो ।

स्वर्गीय चित्रकुमार बजिमयकी धर्मपत्नि मिनाकुमारी वजिमय र दुइ छोरा, तीन छोरीहरु हुनुहुहुन्छ ।