हलेसीन्युजडेस्क, खोटाङ /

मंसिर २०, शनिवार/ खोटाङको दिक्तेल रुपाकोट मझुवागढी नगरपालिका बाँस प्रवर्द्धन, संरक्षण र यसको व्यावसायिक उपयोगमा देखाएको उल्लेखनीय योगदानका लागि नेपाल विज्ञान तथा प्रविधि प्रज्ञा–प्रतिष्ठान (नाष्ट) द्धारा प्रदान गरिने ‘भुवनेश्वर प्रविधि पुरस्कार–२०८२’ बाट पुरस्कृत बनेको छ । नाष्टको ४३औँ वार्षिकोत्सव तथा पुरस्कार वितरण समारोहमा ललितपुर खुमलटारमा आयोजित कार्यक्रममा शिक्षा, विज्ञान तथा प्रविधिमन्त्री एवं नाष्टका सहकुलपति महावीर पुनले दिक्तेल रुपाकोट मझुवागढी नगरपालिकाका लागि घोषणा गरिएको  ‘भुवनेश्वर प्रविधि पुरस्कार–२०८२’ नगरप्रमुख तीर्थराज भट्टराईलाई हस्तान्तरण गर्नुभएको हो।

नाष्टले कृषि, वातावरण संरक्षण, जलस्रोत व्यवस्थापन, जैविक विविधता, शिक्षा, सुशासन, पारदर्शिता, प्राविधिक क्षमता र समग्र विकासका सूचकमा गरेको मूल्याङ्कनमा दिक्तेल रुपाकोट मझुवागढी नगरपालिका देशका ७५३ स्थानीय सरकारमध्ये उत्कृष्ट ठहरिएको नाष्टले जारी गरेको पत्रमा उल्लेख छ। बाँसलाई भवन निर्माण, हस्तकला, व्यवसायिक उत्पादन र वातावरण–मैत्री समाधानका रूपमा उपयोग गर्दै सीप विकास, प्रविधि विस्तार र उद्यमशीलता प्रोत्साहनमा देखाएको प्रभावकारी काम नै यस सम्मानको आधार बनेको हो ।

पुरस्कार प्राप्त गर्दै नगरप्रमुख भट्टराईले यो उपलब्धि नगरवासीको सामूहिक मेहनत र प्रतिबद्धताको नतिजा भएको बताउनुभयो । “यो सम्मानले कृषि, वातावरण, शिक्षा, सामाजिक समावेशीकरण, पूर्वाधार विकास र सुशासनका क्षेत्रमा अझ प्रभावकारी रूपमा काम गर्ने हौसला मिलेको छ ।” उहाँको भनाइ थियो । स्थानीय श्रोत र सामाग्रीहरु नै हाम्रो देशको अर्थतन्त्रको मूल सम्पति र यसको अत्यधिक उपयोगमा जोड दिनुपर्ने उहाँको स्पष्ट धारणा रहदै आएको छ ।

नगरपालिकाले बाँसलाई स्थानीय रोजगारी र आर्थिक अवसरका रूपमा विकास गर्न विभिन्न कार्यक्रम सञ्चालन गर्दै आएको छ । नगरप्रमुख भट्टराई र उपप्रमुख वीशन राईले आफूहरु जनप्रतिनिधिका रुपमा निर्वाचित हुने साथ कार्यकक्षमा समेत बाँसका सामग्री प्रयोग गरी परिवर्तन आफैँबाट शुरु गर्नुपर्ने कहावतलाई पुष्टि गर्नुभएको छ । बाँसलाई संरचनात्मक निर्माण सामग्रीका रूपमा औपचारिक मान्यता दिलाउने ऐतिहासिक मार्गदर्शन पनि यसै अवधिमा नेपाल सरकारले स्वीकृत गरेको छ, जसमा बाँसको कटानी, ग्रेडिङ, रासायनिक उपचारदेखि भूकम्प प्रतिरोधी संरचना निर्माणका प्राविधिक मापदण्ड समेटिएका छन् ।

दिक्तेल रुपाकोट मझुवागढी नगरपालिकाले लामो समयदेखि बाँसजन्य स्रोतको संरक्षण, प्रवर्द्धन तथा प्रयोगमार्फत स्थानीयस्तरमा बाँसलाई भवन निर्माण, हस्तकला, व्यवसायिक उत्पादन तथा वातावरणमैत्री समाधानका रुपमा रुपान्तरणसँगै बाँस सम्बन्धी सीप विकास, प्रविधि विस्तार र उद्यमशीलता प्रोत्साहनमा उल्लेखनीय भूमिका निर्वाह गरेकाले  रु २५ हजार राशीको ‘भुवनेश्वर प्रविधि पुरस्कार–२०८२’ प्राप्त गर्न सफल भएको नगरप्रमुख भट्टराईले हलेसी एफएमलाई बताउनुभयो ।