हलेसीन्युजडेस्क, खोटाङ /

मंसिर १४ / खोटाङको दिक्तेल रुपाकोट मझुवागढी नगरपालिका–३, बाम्राङस्थित चक्र-अञ्जु राई फाउण्डेशनले आफ्नो चौथो वार्षिक साधारण सभाको अवसरमा जिल्लास्तरीय एकल नृत्य प्रतियोगिता आयोजना गर्ने भएको छ । जिल्लाभित्र रहेका विद्यालयका विद्यार्थीहरूको सिर्जनशीलता, प्रतिभा र सांस्कृतिक अभिव्यक्तिलाई प्रोत्साहन गर्ने उद्देश्यसहित प्रतियोगिता गर्न लागिएको फाउण्डेशनका अध्यक्ष लिला बहादुर खत्रीले हलेसी एफ एमलाइ जानकारी दिनुभएको छ । 

अध्यक्ष खत्रीका अनुसार प्रतियोगिता यही मङ्सिर २९ गते बिहान १०ः०० बजेबाट सुरु हुनेछ । जिल्लाका विभिन्न विद्यालयका विद्यार्थीहरूले प्रतिस्पर्धामा सहभागी जनाउन पाउने छन्  ।  एक विद्यालयबाट एक जना विद्यार्थी मात्र प्रतिनिधित्व गर्न पाउने र सहभागी हुन इच्छुक विद्यालयहरूले प्रमाणित सिफारिससहित विद्यार्थीको नाम दर्ता गराउनु पर्ने चक्र–अञ्जु राई फाउण्डेशनका सचिव शिव बहादुर थापाले बताउनु भयो ।  

नाम दर्ता मङ्सिर २७ गते दिउँसो ४ः०० बजेसम्म फाउण्डेशनको कार्यालयमा गर्न सकिने जनाईएको छ।

प्रतियोगितामा मौलिक सांस्कृतिक पहिचान झल्किने नृत्यलाई प्राथमिकता दिईने आयोजकले बताएको छ ।

एकल नृत्य प्रतियोगिताका प्रथम , द्वितीय, तृतीय र सान्त्वना हुनेहरुलाइ क्रमश रु. १० हजार, रु. ७ हजार, रु. ५ हजार र रु २ हजार प्रदान गरिने भएको छ ।

फाउण्डेशनका अध्यक्ष लिला बहादुर खत्रीका अनुसार प्रतियोगिताले स्थानीयस्तरमा रहेका लुकेका प्रतिभा पहिचान र प्रोत्साहन  गर्न महत्वपूर्ण सहयोग पुग्ने विश्वास गरिएको छ। उहाँले मौलिकता, सांस्कृतिक पहिचान र देशप्रेम झल्किने प्रस्तुतिलाई विशेष प्राथमिकता दिईने बताउनुभयो।

प्रतियोगिता सम्बन्धि थप जानकारीका लागि अध्यक्ष लिला बहादुर खत्री तथा सचिव शिव बहादुर थापासँग सम्पर्क गर्न सकिने फाउण्डेशनले जनाएको छ। 

सम्पर्क नम्बर
लिला बहादुर खत्री (अध्यक्ष)-९८४२८४९३०६
शिव बहादुर थापा (सचिव)-९८६०७३०६७३