ग्रामीण महिलालाई उद्यमशिलतामा उन्मुख गराउने लक्ष्य

हलेसीन्युजडेस्क, खोटाङ/

मंसिर १३ / खोटाङको दिक्तेल रुपाकोट मझुवागढी नगरपालिकामा स्थानीय महिलालाई सीपसम्पन्न बनाउने तथा स्वरोजगारतर्फ उन्मुख गराउने उद्देश्यसहित १० दिने मुढा बनाउने सीप विकास तालिम सुरु गरिएको छ । कालिका वडा–स्तरीय महिला समूह दिक्तेलको पहल र टेवा नेपाल, ललितपुरको आर्थिक सहकार्यमा सञ्चालन भएको उक्त तालिमले ग्रामीण महिलालाई व्यावहारिक सीपमार्फत आत्मनिर्भर बनाउने लक्ष्य राखिएको समूहले जनाएको छ ।

देविस्थान एकता समाज दिक्तेलको सभा हलमा सञ्चालन भइरहेको तालिममा ११ जना स्थानीय महिलाहरू सहभागी रहेका छन्। समूहकी सचिव सावित्रा आचार्य (घिमिरे) ले  पछिल्लो समयमा घरेलु सिपबाट निर्मित मुढाको बजारमा बढ्दो माग रहेको र यसबाट महिलाहरूले घरमै बसेर आय–आर्जन गर्न सक्ने अवसर मिलिरहेको बताउनुभयो ।

यो तालिममा भलकाजी विकले सहजिकरण गर्नुहुनेछ भने तालिममा सामग्री छनोट, गुणस्तर कायम राख्ने विधि, बजार मूल्याङ्कन, उत्पादन विस्तार तथा व्यवसायिक व्यवस्थापनसम्बन्धी सीपहरू विस्तृत रूपमा प्रदान गरिनेछ।  विकका अनुसार तालिमपछि महिलाहरूले बजारमा प्रतिस्पर्धी उत्पादन प्रस्तुत गर्न सक्नेछन् ।

कालिका वडा–स्तरीय महिला समूहकी अध्यक्ष लोकमाया थापा (गीता) को अध्यक्षता तथा दिक्तेल रुपाकोट मझुवागढी नगरप्रमुख तीर्थराज भट्टराईको प्रमुख आतिथ्यतामा तालिमको उद्घाटन सम्पन्न भएको छ। उद्घाटन समारोहमा नगरप्रमुख भट्टराईले महिलालाई सीपमार्फत आर्थिक रूपमा सशक्त बनाउन नगरपालिका प्रतिबद्ध रहेको बताउनुभयो। उहाँले भन्नुभयो, “स्थानीय सीपलाई व्यवसायमा रूपान्तरण गर्न सक्नुभयो भने सामुदायिक आर्थिक विकासमा ठूलो योगदान पुग्छ। नगरपालिका यस्ता पहललाई निरन्तर सहयोग र प्रोत्साहन गर्न तयार छ ।”

दिक्तेल रुपाकोट मझुवागढी नगरपालिका–१ का वडाध्यक्ष नवराज राईले महिलाको आर्थिक सक्रियता बढाउन यस्ता तालिम अत्यन्तै आवश्यक रहेको बताउनुभयो। उहाँका अनुसार घरेलु उध्यमका लागि आवश्यक अन्य सहयोग वडा कार्यालयले निरन्तर प्रदान गर्नेछ ।

खोटाङ उद्योग वाणिज्य संघका अध्यक्ष राजन आचार्यले स्थानीय उत्पादनलाई बजारसम्म पु-याउन संघले सहकार्य गर्ने प्रतिबद्धता जनाउनुभयो। उहाँले गुणस्तरीय मुढाको माग बढ्दो रहेको र महिलाहरूको उत्पादनलाई स्थानीय तथा क्षेत्रीय बजारमा प्रवद्र्धन गर्न सहयोग गरिने जानकारी दिनुभयो ।

गैरसरकारी संस्था महासंघ खोटाङका अध्यक्ष युवराज रिजाल तथा नेपाल पत्रकार महासंघ खोटाङका निवर्तमान अध्यक्ष दिलीप खत्रीले पनि सीपमूलक तालिम महिलाको आर्थिक सबलीकरणको प्रभावकारी आधार बन्ने धारणा राख्नुभयो। तालिममा सहभागी महिलाहरूले नयाँ सीप सिकेर घरमै बसेर आय-आर्जन गर्न सकिने भएकाले आफूहरू अत्यन्त उत्साहित रहेको बताउनुभयो। उनीहरूले सिकेको सीपलाई सामूहिक रूपमा प्रयोग गर्दै दीर्घकालीन व्यवसाय विस्तार गर्न सकिने उहाँहरुको कथन थियो ।

दिक्तेल क्षेत्रमा बाँस तथा बाँसजन्य सामग्री प्रशस्त मात्रामा पाइने भएकाले मुढा उत्पादनलाई दिगो स्थानीय उद्योगका रूपमा विकास गर्न सकिने विशेषज्ञहरूको मत छ।

तालिमपछि सहभागी महिलाहरूलाई सामग्री, उपकरण तथा बजार व्यवस्थापनमा पनि सहयोग प्रदान गरिने समूहकी सचिव आचार्यले बताउनुभयो । स्थानीय स्रोतको सदुपयोग, महिलाको सक्रियता तथा दिगो आर्थिक विकासमा केन्द्रित यो तालिमले दिक्तेलमा महिला उद्यमशीलताको नयाँ ढोका खोल्ने अपेक्षा गरिएको छ ।