हलेसीन्युजडेस्क, खोटाङ /

नेपाली कांग्रेस खोटाङका उपसभापति तथा दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईलाई मातृशोक परेको छ । नगरप्रमुख भट्टराईकी आमा पदमकुमारी भट्टराई आइतवार विहानैदेखि अकस्मात विरामी भएपछि दिक्तेल अस्पतालमा उपचारका लागि लैजादा त्यहाँ सम्भव नभएर रिफर भएपछि सोमवार उपचारका लागि काठमाण्डौँ ल्याउने क्रममा भकुण्डेवेशी आइपुगेपछि साँझ ५.५६ वजे उहाँको निधन भएको थाहा भएको छ ।

विक्रम सम्वत १९९४ साल आषाढमा खार्पाका पिता महानन्द पोखरेल र आमा रेणुका पोखरेलको कोखबाट जन्मिनुभएकी पदमकुमारीको विक्रमसम्वत २००६ सालमा दिक्तेल दोर्पा चिउरीडाँडानिवासी लक्ष्मीप्रसाद भट्टराईसँग शुभ विवाह सम्पन्न भएको थियो ।

विक्रम सम्त २०६० माघ ९ गते पति लक्ष्मीप्रसादको देहान्त भएपछि हाल उहाँ छोरा बुहारीका साथमा दोर्पास्थित आफ्नै निवासमा रहदै आउनुभएको थियो ।

लक्ष्मीप्रसाद तथा पदमकुमारीको तीन छोराहरु मध्ये जेठो छोरा गुणराज भट्टराइको विक्रम सम्वत २०६४ सालमा देहान्त भएको हुँदा हाल माइलो छोरा तीर्थराज भट्टराई र कान्छो छोरा परशुराम भट्टराई हुनुहुन्छ । त्यस्तै ४ छोरीहरुमध्ये जेठी छोरी देवी भट्टराई ढकाल (मात्तिम)को  निधन भैसकेको हुँदा हाल माइली छोरी भगवती भट्टराई खतिवडा (दिक्तेल हर्कपुर), साइली छोरी इन्दिरा भट्टराई खतिवडा (धरान) र कान्छी छोरी गीता भट्टराई बुढाथोकी (गाइघाट) तीन छोरीहरु हुनुहुन्छ भने १०७ वर्षीय आमा रेणुका पोखरेल अझपनि झापा दुर्गापुरमा स्वास्थ्य जीवन व्यतीत गर्दै परिवारका साथमा रहनुभएको थाहा भएको छ । 

उहाँको शवलाई सोमवार राती नै अन्तिम सस्कारका लागि दिक्तेल रुपाकोट मझुवागढी नगरपालिका वडा नं. ७ दोर्पाचिउरीडाँडास्थित आफ्नै निवासमा ल्याइएको पारिवारिक श्रोतबाट थाहा भएको छ । मंगलवार विहान पारिवारिक सदस्यहरु, आफन्त, शुभेच्छुकहरुबाट श्रद्धान्जली अर्पण गरिएपछि साप्सुखोला लामदुवालीमा सनातन वैदिक विधिपूर्वक अन्तिम संस्कार गरिने जनाइएको छ ।