हलेसीन्युजडेस्क, खोटाङ /

खोटाङको हलेसी तुवाचुङ नगरपालिका वडा नः ३ च्यास्मीटार स्थित बाङमाका एकै घरका साना दुई नानीहरुको पोखरीमा डुबेर मृत्यु भएको छ । च्यास्मीटार बाङमा निवासी गईन्द्र रार्ईको छोरा वर्ष ६ को संगम रार्ई र छोरी वर्ष ३ की संवृद्दी रार्ईको सुख्खाग्रस्त क्षेत्र मानिने सो क्षेत्रमा सिँचाईका लागि बनाइएको पोखरीमा सोमवार डुबेर मृत्यु भएको हो ।

बैदेशिक रोजगारीको सिलसिलामा गईन्द्र विदेशमा छन् भने घरमा उनकी पत्नी ममता राईको रेखदेखमा नावालक छोराछोरीहरु रहँदै आएको थिए । स्थानीय कलंका आधारभूत विध्यालयमा छोरा संगम २ कक्षामा र छोरी समृद्धी १ कक्षामा पढ्दै थिए । सोमवार सार्वजनिक विदाका कारण छोरा छोरी विध्यालय जान नपरेकोले उनीहरुलाई घरैमा छाडेर आमा ममता बारीको काममा व्यस्त रहँदा संगम र समृद्धी नजिकै रहेको भुतिया खोलाछेउको सिँचाई पोखरीमा खेल्न पुगेको वेला यो दुर्घटना घटेको जनाइएको छ । 

घरमा छाडेका बच्चाहरु नदेखेपछि आमा ममताले उनीहरुको खोजी गर्दै जाँदा भुतिया खोला छेउको पोखरीमा उनीहरु डुबिरहेको अवस्थामा भेटिएको थियो । सामान्य श्वास प्रश्वास चलिरहेको होकी जस्तो अवस्थामा भेटिए पनि बच्चाहरुलाई घरमा ल्याई पुराउँदा उनीहरुको मृत्यु भईसकेको बताइन्छ ।

बाबु विदेशमा रहेको अवस्थामा एकै परिवारका २ नावालक सन्तानको पोखरीमा डुबेर ज्यान गएपछि सिंगो बस्ति शोकमा डुबिरहेको च्यास्मीटारका वडाध्यक्ष भुपाल सिंह राई बताउनुहुन्छ ।

आगलागी नियन्त्रण तथा सिँचाइका लागि भनेर एक वर्ष अगाडि उक्त ठाउँमा एक परियोजना अन्तर्गत रिचार्ज पोखरी निर्माण गरिएको थियो । पोखरी वरिपरि घेरावार लगाउनु पर्नेमा घेराबारा भने लगाइएको थिएन ।