हलेसीन्युजडेस्क, खोटाङ

कोशी सरकारबाट माओवादी केन्द्र अलग भएकै भोलिपल्ट प्रदेश सरकारले पहिचानवादीसँग वार्ता गर्न तीन सदस्यीय वार्ता टोली गठन गरेको छ । जेष्ठ २३ मा माओवादी केन्द्रले सरकार छाडेपछि अल्पमतमा परेको मुख्यमन्त्री हिक्मतकुमार कार्कीले जेष्ठ २४ मा पहिचान पक्षधरसँग वार्ता गर्न समिति गठन गर्नुभएको हो ।

पहिचानवादीहरुसँग वार्ता गर्न खानेपानी, सिँचाइ तथा ऊर्जा मन्त्री तिलकुमार मेन्याङ्वो नेतृत्वको समितिमा सामाजिक विकास मन्त्री बुद्धिकुमार राजभण्डारी र सरकारका प्रवक्ता तथा कृषि मन्त्री भक्तिप्रसाद सिटौला सदस्य रहनुभएको छ ।

मंसिर ४ गतेको प्रदेश सभाको निर्वाचनमा झापा ५ ‘क’ बाट प्रदेश सभा सदस्यमा निर्वाचित भएर पौष २४ गते प्रदेश सरकारको मुख्यमन्त्रिको वागडोर सम्हालेका हिक्मतकुमार कार्कीले आफ्नो कार्यकालको प्रमुख एजेण्डा नै प्रदेश एकको नामाकरण बनाउनु भयो । फल्गुण १७ गते प्रदेश सभाको दुइतिहाइ बहुमतबाट कोशी नामाकरण गर्न सफल हुनुभयो । तर यही सफलता अन्तत सरकार चलाउन सबैभन्दा सकसको विषय बन्न पुग्यो । 

तत्पश्चात उहाँको कार्यकालमा उहाँ मात्र होइन अन्य प्रदेश सांसदहरु पनि ढुककसँग आफ्नो निर्वाचन क्षेत्र घुम्न सकिरहनु भएको छैन । आन्दोलनले दिनदिनै सघन रुप लिदै गयो । कति साँसदहरु आफ्नो जिल्ला गएको वेला  आन्दोलनकारीको प्रतिकार समेत खेप्नु परेको छ । कोशी प्रदेशको राजधानी एककिसिमले रणमैदान जस्तै बन्दै गएको छ भने प्रदेश सभाको बैठक सुरक्षा कर्मीको घेराबन्दिमा गर्नुपर्यो । आन्दोलनकै क्रममा चैत १० गते पदम लिम्बुको मृत्यु भएको थियो ।

यति हुदा हुँदै पनि नामबारे कुनै छलफल नहुने बताउँदै अउनुभएका मुख्यमन्त्री कार्कीले सरकार ढल्ने भएपछि बुधबार बसेको मन्त्रिपरिषद बैठकबाट वार्ता टोली नै बनाएर आन्दोलनकारीलाई वार्ताको ढोका खोलिदिनु भएको छ । आन्दोलनकारीले सरकारको यो प्रयासलाई कसरी लिनेछन्  आधिकारिक प्रतिकृया आउन बाँकी छ ।