हलेसीन्युजडेस्क, खोटाङ

खोटाङको दिक्तेल रुपाकोट मझुवागढी नगरपालिका वडा नं.८ दोर्पा चिउरीडाँडामा निर्माण भैरहेको सिँचाई योजनाको अनुगमन गरिदा स्टिमेट अनुसार नभएको पाइएको छ । नगरप्रमुख तीर्थराज भट्टराई नेतृत्वमा एक टोलि चैत्र २० गते वडा नं. ८ दोर्पाचिउरीडाँडास्थित निर्माणाधिन घट्टेकुलो सिँचाई योजनाको अनुगमन निरीक्षण गर्दा स्टिेमेट अनुसार नपाइएको हो ।

संघीय सरकार, प्रदेश सरकार, नगरपालिका, स्विस सरकार विकास नियोग तथा स्थानीय उपभोक्ताहरुको साझेदारीमा निर्माण भैरहेको घट्टेकुलो सिँचाई योजनाका सम्बन्धमा स्थानीयहरुबाट गुनासाहरु आइरहेकोले चैत्र १९ गते साना सिँचाई क्लष्टर संयोजक .रमा मगरलाई उक्त कुलो अनुगमनका लागि खटाइएको थियो । उहाँले निरीक्षणको क्रममा कुलोको मेशिनरी कामहरु स्टिमेट अनुसार नगरिएको पाइए पछि गुणस्तर सुनिश्चित नहुन्जेलसम्म निर्माण कार्य स्थगित गर्न सुझाव दिएर फर्र्किनुभएको जनाइएको छ । 

त्यसपछि लगत्तै चैत्र २० गते नगरप्रमुख भट्टराई नगरपालिकाको प्राविधिक टोलिसहित स्थलगत अनुगमन निरीक्षणमा जानुभएको थियो । उक्त कुलोका सम्बन्धमा स्थानीय उपभोक्ता तथा पूर्व वडासदस्य हरि चाम्लिङले केहीदिन अगाडि सामाजिक सञ्जालमा घट्टेकुलोको निर्माण कार्य  गुणस्तरहिन भएको भन्दै सम्बन्धित निकायले चाँडो अनुगमन गर्नुपर्ने मनसायका साथ भिडियो पोष्ट गर्नुभएको थियो ।

अनुगमनका क्रममा निर्माणाधिन कुलोको दुईचार ठाउँमा भत्काएर हेर्दा कतिपय ठाउँमा स्टिमेट अनुसार फलामे रड नराखिएको पाइएको नगरप्रमुख भट्टराई बताउनुहुन्छ ।

नगरप्रमुखको संयोजकत्वमा बनेको साना सिँचाई कार्यक्रम कार्यान्वयन समितिले प्राविधिक स्टिमेट बमोजिम कार्य भएको प्रतिवेदन प्राप्त भएपछि मात्र बाँकी रकम उपलव्ध गराइने भएको छ ।  प्राविधिक स्टिमेट अनुसार काम हुन नसकेमा पेश्की वापत लगिएको रकम समेत फिर्ता गरिनुपर्ने जनाइएको छ ।

संघीय सरकारबाट रु ११ लाख ५६ हजार, प्रदेश सरकारबाट रु ११ लाख ५६ हजार, नगरपालिकाको तर्फबाट रु ११ लाख ५६ हजार, स्विस सरकार नियोगबाट रु १७ लाख ३४ हजार र स्थानीय उपभोक्ता समितिको तर्फबाट रु ५ लाख ७८ हजार लागत साझेदारीबाट कुल वजेट रु. ५७ लाख ८० हजार रकममा निर्माण सम्पन्न गर्नेगरी गत पौष ८ गते स्थानीय गोविन्द बहादुर कठैतको अध्यक्षतामा गठन भएको उपभोक्ता समितिले सम्झौता गरी काम अगाडि बढाइएको थियो । 

सम्झौता पत्र अनुसार कुलो २०८१ बैशाख २० गतेभित्र सम्पन्न गरिसक्नुपर्नेमा निर्माणकै चरणमा यस्तो कमजोरी पाइएपछि स्थानीयहरु चिन्तित रहेको पाइएको छ ।