हलेसीन्युजडेस्क, खोटाङ
      नेपाली कांग्रेसका वरिष्ठ नेता रामचन्द्र पौडेल राजनैतिक जीवनको उत्तरार्द्धमा गणतन्त्र नेपालको तेश्रो राष्ट्रपति बन्नुभएको छ । नेपाली कांग्रेसका नेता रामवरण यादव प्रथम राष्ट्रपति, नेकपा एमालेका नेता विध्यादेवी भण्डारी दोश्रो राष्ट्रपतिमा र आज भएको निर्वाचनमा राष्ट्रपति पदका अर्का उम्मेदवार पूर्वसभामुख सुवासचन्द्र नेम्वाङलाई पराजित गर्दै पौडेल तेश्रो राष्ट्रपति बन्न सफल हुनुभएको हो ।
     पौडेलले ३३ हजार ८ सय २ मतभार प्राप्त गर्नुभयो भने उहाँका प्रतिस्पर्धी नेम्बाङले १५ हजार ५ सय १८ मतभार प्राप्त गर्नुभएको छ । राष्ट्रपति चुनावमा संघीय संसद्तर्फ ३१३ सांसद (२४ हजार ७ सय २७ मतभार) ले मतदान गरेका थिए भने प्रदेशतर्फ ५१८ (२४ हजार ८ सय ६४ मतभार ) सांसदले मत दिएका थिए । चुनावी प्रक्रियामा सहभागी भएका सांसदहरुको कूल मतभार ४९ हजार ५ सय ९१ थियो । राष्ट्रपति निर्वाचित हुनका लागि २६ हजार ३ सय १५ आवश्यक पर्छ । राष्ट्रपति र उपराष्ट्रपति निर्वाचनमा संघीय सांसद र प्रदेश सभा सदस्यहरूको हाल कायम रहेको मतभार ५२ हजार ६ सय २८ थियो ।
       मतदानमा अनुपस्थित हुनेमा राप्रपाका १४ जना सांसद रहेका छन् । त्यस्तै नेमकिपाका प्रेम सुवाल पनि मतदानमा सहभागी हुनुभएन । त्यसैगरी माओवादी सांसद वर्षमान पुन र कांग्रेस सांसद उपचारका लागि चीन र भारतमा हुनुहुन्छ । एमालेका फरार सांसद लक्ष्मी महतो कोइरी पनि मतदानमा सहभागी हुनुभएन । प्रदेशतर्फ पनि राप्रपाका २८ र नेमकिपाका ३ सांसद मतदानमा सहभागी भएनन् । त्यस्तै मधेश प्रदेशकी जसपा सांसद विन्दु यादव अनुस्थित रहनुभयो ।
      अठहत्तर वर्ष अगाडि तनहुँको ब्यासमा जन्मनुभएका पौडेल ६३ वर्षभन्दा वढी राजनैतिक यात्रामा सकृय रहनुभएको छ । १५ वर्षे कलकलाउँदो उमेर हुँदा  २०१६ सालमा पौडेल हिमालयन छात्र संघको सदस्य बनेर राजनैतिक यात्राको प्रस्थान विन्दु तय गर्नुभयो । २०१७ सालमा राजाले संसद् भङ्ग गरी वीपीलाई जेल हालेको विरोधमा उहाँ प्रजातान्त्रिक आन्दोलनमा सहभागी रहनुभयो र त्यसपछि सक्रिय राजनीतिमा अघि बढिरहनुभयो ।
     यसैक्रममा क्रममा पटक–पटक गिरफ्तार र १५ वर्ष जेल जीवन बिताउनुभएका पौडेल ६ पटक सांसद, ५ पटक मन्त्री र एकपटक प्रतिनिधिसभाको सभामुख बन्नुभयो । २०६६ सालमा प्रधानमन्त्री बन्नका लागि संसदमा १७ पटकसम्म चुनावी प्रतिस्पर्धामा भाग लिनुभएपनि उहाँले जित हासिल गर्न सक्नुभएन । र अन्ततः नौ दलीय सत्ता गठबन्धनले साझा उम्मेदवार बनाएपछि पहिलो प्रयासमै आज भने राष्ट्रपति बन्न सफल हुनुभएको हो ।