५७ कैदी लाभान्वित, ३० जनालाई चस्मा वितरण

हलेसीन्युजडेस्क, खोटाङ

चैत्र १३, शुक्रवार ÷ नेपाल नेत्र ज्योति संघको ४८औँ स्थापना दिवसको अवसर पारेर खोटाङ जिल्लाको दिक्तेल कारागारमा रहेका कैदीहरूलाई लक्षित गर्दै एक दिने निःशुल्क आँखा जाँच तथा चस्मा वितरण कार्यक्रम सम्पन्न भएको छ । समाजका सबै वर्गसम्म स्वास्थ्य सेवा पहुँच विस्तार गर्ने उद्देश्यका साथ नेत्र ज्योति संघ खोटाङद्धारा सञ्चालन गरिएको उक्त कार्यक्रमले कारागारभित्र रहेका कैदीहरूको स्वास्थ्य अवस्थाप्रति सकारात्मक ध्यानाकर्षण गराएको छ ।

कार्यक्रम अन्तर्गत कुल ५७ जना कैदीहरूको आँखा परीक्षण गरिएको थियो, जसमा ५६ जना पुरुष र १ जना महिला रहेका थिए । आँखा उपचार केन्द्रबाट खटिएका प्राविधिक टोलीले गरेको जाँचका क्रममा धेरै कैदीहरूमा दृष्टि कमजोर हुने, आँखा पोल्ने, टाउको दुख्ने तथा नजिक–टाढा देख्न समस्या हुने जस्ता समस्या देखिएको जानकारी दिइएको छ ।

नेपाल नेत्र ज्योति संघ खोटाङका सभापति इन्द्र कसजुले हलेसी एफ एमसँग कुराकानी गर्दै आँखा मानव जीवनको संवेदनशील अंग भएको उल्लेख गर्नुभयो । उहाँका अनुसार विभिन्न कारणले मानिसको आँखाको दृष्टि क्षमतामा ह्रास आउँछ, जसको यथोचित उपचार गर्न सके दृष्टि क्षमता फर्काउन सकिन्छ ।

आज कैदीहरुको आँखा जाँचपछि आवश्यकताअनुसार ३० जनालाई निःशुल्क चस्मा वितरण गरिएको छ भने २० जनालाई औषधि उपलब्ध गराइएको छ । साथै, ७ जनालाई थप उपचार तथा नियमित जाँचका लागि सल्लाह दिइएको छ ।

सभापति कसजुले कारागारभित्र रहेका व्यक्तिहरू स्वास्थ्य सेवाबाट वञ्चित हुने अवस्थालाई ध्यानमा राख्दै यस्ता कार्यक्रम सञ्चालन गरिएको बताउनुभयो । उहाँले “कारागारभित्र रहेका व्यक्तिहरू पनि समाजकै हिस्सा हुन्, उनीहरूको स्वास्थ्यप्रति ध्यान दिनु सबैको दायित्व हो” भन्दै समयमै परीक्षण र उपचारको आवश्यकता औंल्याउनुभयो ।

कार्यक्रमप्रति कैदीहरूमा उत्साहजनक सहभागिता देखिएको थियो । लामो समयदेखि आँखा समस्या भोगिरहेका कैदीहरूले पहिलो पटक निःशुल्क जाँच तथा उपचार पाउँदा खुशी व्यक्त गरेका छन् । चस्मा प्राप्त गरेपछि दैनिक जीवन सहज हुने उनीहरूको प्रतिकृया रहेको छ ।

कारागार प्रशासनले पनि कार्यक्रमलाई सकारात्मक रूपमा लिँदै यस्ता स्वास्थ्य सेवामूलक गतिविधिले कैदीहरूको जीवनस्तर सुधारमा महत्वपूर्ण योगदान पु¥याएको जनाएको छ । आगामी दिनमा यस्ता कार्यक्रमहरूलाई निरन्तरता दिनुपर्ने तर्फ सरोकार पक्षको ध्यानाकर्षण गराइएको छ ।

नेपाल नेत्र ज्योति संघले स्थापना दिवसलाई औपचारिकतामा सीमित नराखी समाजका पिछडिएका तथा पहुँचविहीन वर्गसम्म स्वास्थ्य सेवा विस्तार गर्ने लक्ष्य लिएको जनाएको छ । संघले विगतदेखि नै देशका विभिन्न स्थानमा निःशुल्क आँखा जाँच, शल्यक्रिया शिविर तथा जनचेतनामूलक कार्यक्रम सञ्चालन गर्दै आएको छ ।

यस कार्यक्रमले उपचार सेवा मात्र नभई आँखा स्वास्थ्यप्रति जनचेतना अभिवृद्धि गर्न र समयमै समस्या पहिचान गर्न प्रेरित गर्ने विश्वास गरिएको छ । कारागारभित्र सञ्चालन गरिएको यो कार्यक्रम सामाजिक उत्तरदायित्वको उत्कृष्ट उदाहरणका रूपमा रहेको स्थानीयवासी बताउछन् ।