वैशाख २ देखि असार ७ सम्म जिल्लाभर तथ्याङ्क संकलन

हलेसीन्युजडेस्क, खोटाङ ।

चैत्र २४, मंगलवार / जिल्लाको समग्र आर्थिक अवस्थाको यथार्थ चित्र प्रस्तुत गर्दै दीर्घकालीन विकासको आधार तयार गर्ने उद्देश्यका साथ दोस्रो “राष्ट्रिय आर्थिक गणना, २०८२” खोटाङमा सञ्चालन हुने भएको छ। जिल्ला आर्थिक गणना कार्यालय, खोटाङका अनुसार गणना कार्य आगामी २०८३ साल वैशाख २ गतेदेखि सुरु भई असार ७ गतेसम्म जिल्लाभर सञ्चालन गरिनेछ ।

जिल्ला आर्थिक गणना अधिकारी विकास मल्लले हलेसी एफ.एम.सँग कुराकानी गर्दै आर्थिक गणना मुलुकको आर्थिक संरचना बुझ्नका लागि महत्वपूर्ण राष्ट्रिय अभियान भएको बताउनुभयो। उहाँका अनुसार यसले उद्योग, व्यापार, कृषि, सेवा लगायतका सबै क्षेत्रका आर्थिक गतिविधिहरूको विस्तृत तथा विश्वसनीय तथ्याङ्क संकलन गर्नेछ।
“आर्थिक गणना कुनै एक क्षेत्रमा सीमित नभई समग्र आर्थिक क्रियाकलापहरूको यथार्थ विवरण प्रस्तुत गर्ने आधार हो,” मल्लले भन्नुभयो, “यसबाट प्राप्त तथ्याङ्कले नीति निर्माण, योजना तर्जुमा र स्रोत व्यवस्थापनमा महत्वपूर्ण सहयोग पु-याउँछ।”

गणना कार्यलाई व्यवस्थित र प्रभावकारी बनाउन आवश्यक तयारी पूरा भइसकेको कार्यालयले जनाएको छ । गणनामा खटिने सुपरिवेक्षक तथा गणकहरूलाई २०८२ चैत २६ गतेदेखि ३० गतेसम्म पाँच दिने तालिम प्रदान गरिनेछ। त्यसपछि उनीहरूलाई वैशाख २ देखि असार ७ सम्म जिल्लाका १० वटै स्थानीय तहमा परिचालन गरिनेछ ।

यस अभियानअन्तर्गत साना, मझौला तथा ठूला उद्योग, व्यापारिक प्रतिष्ठान, शैक्षिक संस्था, वित्तीय संस्था लगायत सबै प्रकारका आर्थिक गतिविधिमा संलग्न व्यवसायहरू समेटिने छन्। संकलित तथ्याङ्कले जिल्लाको उद्योग–व्यवसायको अवस्था, रोजगारीको स्थिति, उत्पादन तथा सेवा क्षेत्रको वास्तविक चित्र स्पष्ट पार्ने विश्वास गरिएको छ ।

जिल्ला आर्थिक गणना अधिकारी मल्लले गणना कार्य सफल बनाउन स्थानीय तह, सरोकारवाला निकाय तथा सर्वसाधारणलाई सहयोग गर्न आग्रह गर्नुभएको छ। “गणकहरूले मागेका विवरण सही र पूर्ण रूपमा उपलब्ध गराउनु सबै नागरिकको दायित्व हो,” उहाँले उल्लेख गर्नुभयो ।

यसपटकको आर्थिक गणनाले खोटाङ जिल्लाको आर्थिक सम्भावना, चुनौती तथा विकासका प्राथमिकता पहिचान गर्न महत्वपूर्ण योगदान पु-याउने अपेक्षा गरिएको छ ।