हलेसीन्युजडेस्क, खोटाङ,

चैत्र १७, मंगलवार / खोटाङ जिल्लाको प्रसिद्ध धार्मिक तथा पर्यटकीय केन्द्र हलेसीमा सञ्चालन गरिएको तीनदिने निःशुल्क आँखा शिविर सफलतापूर्वक सम्पन्न भएको छ। साथै, यसै कार्यक्रमको निरन्तरतास्वरूप अब दिक्तेलमा पनि यस्तै स्वास्थ्य शिविर सञ्चालनको तयारी भैरहेको जनाइएको छ ।

हलेसीतुवाचुङ नगरपालिका वडा नं. ७ स्थित स्वास्थ्य चौकीमा चैत्र १४ गतेदेखि १६ गतेसम्म सञ्चालन गरिएको उक्त शिविरले सयौं सर्वसाधारणलाई प्रत्यक्ष स्वास्थ्य सेवा प्रदान गर्दै प्रभावकारी रूपमा समापन भएको हो। स्थानीय बासिन्दामा बढ्दो आँखासम्बन्धी समस्यालाई मध्यनजर गर्दै आयोजना गरिएको शिविरप्रति सुरुदेखि नै उत्साहजनक सहभागिता देखिएको थियो ।

शिविरको पहिलो दिन १३५ जनाले नाम दर्ता गराई आँखा परीक्षण गराएका थिए । परीक्षणका क्रममा २३ जनामा शल्यक्रिया आवश्यक देखिएकाले उनीहरूको सफल अप्रेसन गरिएको थियो। साथै ७६ जनालाई आवश्यक औषधि वितरण गरिएको थियो भने ३५ जना जेष्ठ नागरिकलाई निःशुल्क चस्मा उपलब्ध गराइएको थियो ।

शिविरको अन्तिम दिन सहभागिता झनै उल्लेखनीय रूपमा बढेको थियो। उक्त दिन मात्रै ४७९ जनाले नाम दर्ता गराई आँखा जाँच गराएका थिए। परीक्षणपछि ८० जनाको सफल शल्यक्रिया गरिएको आयोजकले जनाएको छ। त्यस्तै ३९४ जनालाई औषधि वितरण गरिएको थियो भने १३७ जनाले चस्मा प्राप्त गरेका छन् ।

तीन दिनको अवधिमा सञ्चालन गरिएको यस शिविरबाट कुल सयौं बिरामीले सेवा लिएका छन्, जसमा अधिकांश ग्रामीण भेगका सर्वसाधारण तथा जेष्ठ नागरिक रहेका छन्। दुर्गम क्षेत्रका बासिन्दाका लागि सहज रूपमा स्वास्थ्य सेवा उपलब्ध नहुँदा यस्ता निःशुल्क शिविरहरूले ठूलो राहत पु¥याएको सहभागीहरूले बताएका छन् ।

शिविरमा प्राविधिक सहयोग सगरमाथा चौधरी आँखा अस्पताल, लहान र आँखा उपचार केन्द्र, दिक्तेलले गरेको थियो भने आयोजक नेपाल नेत्र ज्योति संघ, खोटाङ रहेको थियो । हलेसी तुवाचुङ नगरपालिका ले कार्यक्रम सञ्चालनमा सहजीकरण गरेको थियो ।

नेपाल नेत्रज्योति संघ खोटाङका अनुसार हलेसीमा सफलतापूर्वक सम्पन्न भएको आँखा शिविरपछि अब दिक्तेलमा पनि निःशुल्क आँखा शिविर सञ्चालन गरिने भएको छ। आयोजकका अनुसार दिक्तेलमा चैत्र १९, २० र २१ गते तीन दिनसम्म शिविर सञ्चालन हुनेछ ।

दिक्तेलमा सञ्चालन हुन लागेको शिविरमा दिक्तेल रुपाकोट मझुवागढी नगरपालिका ले सहजीकरण गर्नेछ। शिविरबाट ठूलो सङ्ख्यामा सर्वसाधारण लाभान्वित हुने अपेक्षा गरिएको छ। विशेषगरी दुर्गम गाउँका नागरिक, आर्थिक रूपमा कमजोर वर्ग तथा जेष्ठ नागरिकलाई लक्षित गरी सेवा प्रदान गरिने जनाइएको छ ।

शिविरमा विशेषज्ञ चिकित्सकद्वारा आँखा परीक्षण, आवश्यक औषधि वितरण, चस्मा प्रदान तथा आवश्यक परेमा शल्यक्रिया समेत निःशुल्क रूपमा गरिनेछ। हलेसीमा जस्तै दिक्तेलमा पनि सम्बन्धित निकाय, स्वास्थ्य संस्था र सरोकारवालाको सहकार्यमा शिविर सञ्चालन गरिने तयारी भइरहेको छ । यसले जिल्लामा आँखासम्बन्धी रोगको पहिचान, उपचार तथा जनचेतना अभिवृद्धिमा महत्वपूर्ण योगदान पुग्ने विश्वास गरिएको छ ।