हलेसीन्युजडेस्क, खोटाङ /

खोटाङको समग्र विकास निर्माण तथा गत अशोज दोश्रो हप्तामा परेको भिषण वर्षादका कारण वाढी पहिरोले पुराएको क्षतिका सम्बन्धमा खोटाङको एक प्रतिनिधि मण्डलले प्रधानमन्त्री केपी शर्मा ओली तथा अर्थ मन्त्री विष्णु पौडेललाई भेटेर ज्ञापन पत्र बुझाएको छ । प्रतिनिधि सभा सदस्य रामकुमार राईको नेतृत्वमा संविधान सभा सदस्य उषाकला राई तथा समिता कार्की, जिल्लाका राजनैतिकि दलका प्रमुख एवं प्रतिनिधिहरु, स्थानीयतहका जनप्रतिनिधिहरु, विभिन्न क्षेत्रका विज्ञहरु, समाजसेवी लगायतको प्रतिनिधिमण्डलले आज प्रधानमन्त्री केपी शर्मा ओली तथा अर्थमन्त्री विष्णु पौडेललाई प्रधानमन्त्रीको सचिवालय वालुवाटारमा भेटी जिल्लाको समग्र विकास निर्माण तथा वाढी पहिरोले पुराएको क्षतिका वारेमा ज्ञापन पत्र मार्फत ध्यानाकर्षण गराउदै त्यसका लागि सरकारले यथोचित व्यवस्थापन गर्न अनुरोध गरेको छ ।

सो अवसरमा दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईले पनि नगरपालिकामा वाढी पहिरोका कारण पुराएको क्षति र थप विकास निर्माणका आयोजनाहरुको माग सहित ज्ञापनपत्र बुझाउनुभयो ।

उक्त अवसरमा प्रधानमन्त्री ओलीले यस सम्बन्धमा आफ्नो सरकार अत्यन्त संवेदनशिल रहेको र भोलि वस्ने राष्ट्रिय विपद् जोखिम न्यूनीकरण तथा व्यवस्थापनको बैठकमा छलफल गरी निर्णय गरिने बताउनुभयो । फोक्सिन्टारको पूल बगाएकोले त्यहा वैकल्पिक पुल या वेलिव्रिज लगाउने सम्बन्धमा पनि सोँच रहेको बताउनु भयो ।

आजै उर्जा जलश्रोत तथा सिँचाई मन्त्रि दिपक खड्कालाई पनि खोटाङको प्रतिनिधि मण्डलले भेटी राष्ट्रिय गौरवको योजना दुधकोशी हाइड्रोलाई द्रुतगतिमा अगाडि बढाउन मुआवजाको व्यवस्था गरिनुपर्ने, वाढी पहिरोले क्षति पुराएको सिँचाई कुलोका लागि राहत स्वरुप वजेट व्यवस्थापन गरिनुपर्ने लगायतको माग गरिएको नेपाली कांग्रेसका सभापति विष्णुकुमार राईले बताउनुभयो ।