हलेसीन्युजडेस्क, खोटाङ

खोटाङ दोर्पाका किसानहरु बाँदरको ज्यादतीबाट हैरान भएका छन् । खेतमा रोपेर दाना लागेका मकैका घोगा हजारिया बाँदरले खाएर सिँगो खेत नै रित्तो बनाइदिए पछि दोर्पाका किसानहरु हैरान बन्न पुगेका हुन ।

दिक्तेलरुपाकोट मझुवागढी नगरपालिका वडा नं. ७ दोर्पा पिप्लेगाउँकी ७५ वर्षीया सरस्वता वुढाथोकी खेतमा घोगा नभएका रित्ता मकैको वोट समातेर रुँदै आफ्नो व्यथा हलेसी एफएमलाई सुनाउनुभयो । उहाँको रोदनमिश्रित गुनासो थियो-वर्षेनी कसरी सक्नु । रोपेर मुखमा लाउने वेलाको अन्नवाली सधै बाँदरले गर्दा घरमा भित्र्याउन पाइन्न । हाम्रो दुख कष्ट कस्ले सुनिदिने ! 

सोमवार र मंगलवार  दोर्पा पिप्ले बुढाथोकी गाउँको सेराखेत देखि लुभु खेत सम्मका सबै मकै बाँदरले सखाप बनाएको स्थानीय पदम हिङमाङले बताउनुभयो । दोर्पा पिप्ले गाउँका वीरबहादुर बुढाथोकी, गोरेबहादुर वुढाथोकी, कटकबहादुर बुढाथोकी, हरि बुढाथोकी, जीतबहादुर बुढाथोकी, भिम बुढाथोकी, कमला बुढाथोकी र सरस्वता वुढाथोकीको खेतमा रोपिएका मकै बाँदरले खादा करिव १२ मुरी मकै क्षति हुन गएको हिङमाङ बताउनुहुन्छ । 

दोर्पा माथाटोल र मार्सेमा मकै छरेर उम्रिदै गरेको विरुवा नै बाँदरले  खाइदिँदा अहिले सिँगो खेत बाँझो बन्न पुगेको छ ।

हरेक वर्ष वाँदरको ज्यादतीका वारेमा स्थानीय सरकार, स्थानीय प्रशासन र केन्द्रका जनप्रतिनिधिहरु समक्ष गुनासो गरिरहे पनि केही सहयोग नपाएको वीरबहादुर वुढाथाकी सुनाउनुहुन्छ ।

बाँदरको आतंकबाट आजित बनेर केही छिमेकीहरु वसाइ लागेका समेत उहाँको कथन छ ।