हलेसीन्युजडेस्क, खोटाङ /

२९ साउन, शुक्रवार । खोटाङको जन्तेढुङ्गा गाउँपालिकाले आर्थिक वर्ष २०८३/०८४ को वार्षिक कार्यक्रमअनुसार गाउँपालिकाभित्रका इच्छुक युवाहरूलाई लक्षित गर्दै निःशुल्क लोक सेवा तयारी कक्षा सञ्चालन गर्ने भएको छ । लोक सेवा आयोगबाट सञ्चालन हुने विभिन्न प्रतिस्पर्धात्मक परीक्षाको तयारी गरिरहेका युवाहरूलाई सहज रूपमा अध्ययन गर्ने वातावरण निर्माण गर्ने उद्देश्यले गाउँपालिकाले यस्तो कार्यक्रम ल्याएको हो ।

गाउँपालिकाले प्रकाशित गरेको सूचनाअनुसार निःशुल्क लोक सेवा तयारी कक्षामा सहभागी हुनका लागि कम्तीमा एसएलसी÷एसईई उत्तीर्ण गरेको हुनुपर्नेछ। पुरुषको हकमा १८ वर्ष पूरा भई ३५ वर्ष ननाघेको तथा महिला र अपाङ्गताको हकमा १८ वर्ष पूरा भई ४० वर्ष ननाघेको हुनुपर्ने व्यवस्था गरिएको छ।

योग्यता पुगेका इच्छुक व्यक्तिहरूले सूचना प्रकाशित भएको मितिले १५ दिनभित्र गाउँपालिकाको कार्यालयमा गाउँपालिकाले तयार गरेको निवेदनको ढाँचाबमोजिम आवेदन पेश गर्नुपर्नेछ। आवेदनका साथ सहभागी हुने सम्बन्धी निवेदन, हालसालै खिचिएको पासपोर्ट साइजको फोटो, नेपाली नागरिकताको प्रमाणपत्रको प्रतिलिपि तथा शैक्षिक योग्यताको प्रमाणपत्रहरूको प्रतिलिपि पेश गर्नुपर्ने गाउँपालिकाले जनाएको छ।

निःशुल्क लोक सेवा तयारी कक्षा सञ्चालन गर्ने निर्णयले आर्थिक रूपमा कमजोर तथा निजी तयारी कक्षामा सहभागी हुन नसक्ने विद्यार्थी तथा युवाहरूलाई विशेष लाभ पुग्ने अपेक्षा गरिएको छ। गाउँपालिकामै बसेर लोक सेवा आयोगको तयारी गर्न पाउने भएपछि सरकारी सेवामा प्रवेश गर्ने लक्ष्य बोकेका स्थानीय युवाहरूलाई यस कार्यक्रमले थप उत्साहित बनाउने विश्वास गरिएको छ।

यसैबीच, जन्तेढुङ्गा गाउँपालिका अध्यक्ष अरुणा देवी राईले स्थानीय युवाहरूको क्षमता विकास र रोजगारीका अवसरसँग जोडिने गरी गाउँपालिकाले विभिन्न कार्यक्रम सञ्चालन गर्दै आएको बताउनुभएको छ। लोक सेवा आयोगको तयारी गर्न चाहने युवाहरूलाई आर्थिक अभावका कारण अवसरबाट वञ्चित हुन नपरोस् भन्ने उद्देश्यले निःशुल्क तयारी कक्षा सञ्चालन गर्न लागिएको उहाँको भनाइ छ।

अध्यक्ष राईले गाउँपालिकाले सञ्चालन गर्न लागेको यस कार्यक्रमबाट बढीभन्दा बढी इच्छुक तथा योग्य युवाहरू लाभान्वित हुने विश्वास व्यक्त गर्नुभएको छ। सरकारी सेवामा प्रवेश गर्न चाहने युवाहरूले अवसरको सदुपयोग गर्दै नियमित अध्ययन, अनुशासन र मेहनतका साथ तयारी गर्नुपर्नेमा समेत उहाँले जोड दिनुभएको छ।

त्यस्तै, जन्तेढुङ्गा गाउँपालिका उपाध्यक्ष खेमबहादुर खड्काले लोक सेवा तयारी कक्षा स्थानीय युवाहरूका लागि महत्वपूर्ण अवसर भएको बताउनुभएको छ। गाउँपालिकाबाट प्रदान गरिने निःशुल्क तयारी कक्षाले विद्यार्थी तथा युवाहरूलाई लोक सेवा आयोगको प्रतिस्पर्धात्मक परीक्षाका लागि आवश्यक तयारी गर्न सहयोग पुग्ने उहाँको भनाइ छ।

उपाध्यक्ष खड्काले योग्य तथा इच्छुक सबैलाई निर्धारित समयभित्र आवश्यक कागजातसहित आवेदन पेश गर्न आग्रह गर्दै गाउँपालिकाले उपलब्ध गराएको अवसरलाई अधिकतम उपयोग गर्न अनुरोध गर्नुभएको छ। लोक सेवा परीक्षामा सफल हुन निरन्तर अध्ययन, अभ्यास र लगनशीलता आवश्यक पर्ने भएकाले कक्षामा सहभागी हुनेहरूलाई नियमित रूपमा अध्ययनमा केन्द्रित हुनसमेत उहाँले आग्रह गर्नुभएको छ।

गाउँपालिकाले सञ्चालन गर्न लागेको यो कार्यक्रम स्थानीय तहमा रहेका युवाहरूलाई शिक्षा, सीप, क्षमता विकास तथा रोजगारीसँग जोड्ने प्रयासका रूपमा समेत हेरिएको छ। लोक सेवा आयोगको तयारीका लागि आवश्यक विषयवस्तु, परीक्षा प्रणाली र अध्ययन विधिबारे मार्गदर्शन प्राप्त हुने भएकाले कक्षा सहभागीहरूका लागि उपयोगी हुने अपेक्षा गरिएको छ।
गाउँपालिकाका अनुसार कक्षा सञ्चालन हुने मिति र समय भने पछि छुट्टै सूचना प्रकाशन गरी जानकारी गराइनेछ। त्यसैले आवेदन दिन इच्छुक व्यक्तिहरूले गाउँपालिकाले तोकेको समयसीमाभित्र आवेदन पेश गरी कक्षा सञ्चालनसम्बन्धी थप सूचनाको प्रतीक्षा गर्नुपर्नेछ।

जन्तेढुङ्गा गाउँपालिकाले स्थानीय युवाहरूको क्षमता अभिवृद्धि गर्दै उनीहरूलाई सरकारी सेवामा प्रवेशका लागि आवश्यक तयारीको अवसर प्रदान गर्ने उद्देश्यले ल्याएको यस कार्यक्रमलाई सकारात्मक रूपमा हेरिएको छ। कार्यक्रम प्रभावकारी रूपमा सञ्चालन भएमा गाउँपालिकाका धेरै युवाहरूलाई लोक सेवा आयोगको प्रतिस्पर्धामा सहभागी हुन थप हौसला र आधार मिल्ने अपेक्षा गरिएको छ ।