हलेसीन्युजडेस्क,खोटाङ/

जेठ २५, सोमवार । खोटाङको दिक्तेल रूपाकोट मझुवागढी नगरपालिका–१४ बुइँपामा एक दिने निःशुल्क स्वास्थ्य शिविर सञ्चालन हुने भएको छ । छिमेक लघुवित्त वित्तीय संस्था लिमिटेड, शाखा कार्यालय दिक्तेलको आयोजनामा यही जेठ ३० गते शनिबार चम्पावती माध्यमिक विद्यालयको प्राङ्गणमा शिविर सञ्चालन गर्न लागिएको हो ।

स्थानीय नागरिकलाई सहज, सुलभ तथा गुणस्तरीय स्वास्थ्य सेवा उपलब्ध गराउने उद्देश्यले आयोजना गरिने शिविरमा काठमाडौंबाट आएका वरिष्ठ चिकित्सक तथा अनुभवी स्वास्थ्यकर्मीहरूले स्वास्थ्य परीक्षण, परामर्श तथा उपचारसम्बन्धी सेवा प्रदान गर्ने आयोजकले जनाएको छ। ग्रामीण क्षेत्रमा विशेषज्ञ स्वास्थ्य सेवा सहज रूपमा उपलब्ध नहुने अवस्थालाई मध्यनजर गर्दै शिविर सञ्चालन गर्न लागिएको बताइएको छ ।

शिविरमा महिला रोगसम्बन्धी विशेषज्ञ सेवा, हाडजोर्नी तथा नसासम्बन्धी रोगको परीक्षण, साथै जनरल फिजिसियनमार्फत विभिन्न स्वास्थ्य समस्याको जाँच तथा परामर्श प्रदान गरिनेछ। स्वास्थ्य परीक्षणपछि आवश्यक पर्ने औषधि समेत निःशुल्क वितरण गरिने व्यवस्था मिलाइएको आयोजकको भनाइ छ ।

शिविरबाट बुइँपा तथा आसपासका वडाका नागरिक प्रत्यक्ष रूपमा लाभान्वित हुने अपेक्षा गरिएको छ । विशेषगरी आर्थिक अवस्था कमजोर भएका, नियमित स्वास्थ्य परीक्षण गर्न नपाएका तथा विशेषज्ञ चिकित्सकसम्म सहज पहुँच नभएका नागरिकका लागि शिविर फलदायी हुने विश्वास गरिएको छ। यस अवसरमा नागरिकहरूले स्वास्थ्य अवस्थाबारे जानकारी लिनुका साथै रोगको प्रारम्भिक पहिचान र आवश्यक परामर्श प्राप्त गर्न सक्नेछन्।

छिमेक लघुवित्त वित्तीय संस्था लिमिटेडले सामाजिक उत्तरदायित्व अन्तर्गत स्वास्थ्य शिविर आयोजना गर्न लागिएको जनाएको छ । संस्थाले स्थानीयवासीलाई आफ्नो तथा परिवारका सदस्यहरूको स्वास्थ्य परीक्षण गराई शिविरको अधिकतम लाभ लिन आग्रह गरेको छ । ग्रामिण क्षेत्रका नागरिकलाई स्वास्थ्य सेवाको पहुँच विस्तार गर्न सहयोग पुग्ने विश्वासका साथ आयोजना गरिने उक्त शिविरमा उल्लेख्य सहभागिता रहने अपेक्षा गरिएको छ ।