हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिका अन्तर्गत सुरक्षित आप्रवासन सामी कार्यक्रमले सञ्चालन गरिरहेको वित्तिय साक्षरता तथा मनोसामाजिक परामर्श कक्षाको अनुगमन गरिएको छ । नगरपालिकाका वडा नं. १२ जाल्पा र वडानं. १३ नुनथलामा सञ्चालनमा रहेको २१ हप्ते वित्तिय साक्षरता तथा मनोसामाजिक परामर्श कक्षाको मंगलवार नगरपालिकाको तर्फबाट अनुगमन शुरु गरिएको नगरप्रमुख तीर्थराज भट्टराईले बताउनुभयो ।

यतिखेर नगरप्रमुख भट्टराईका साथ उपप्रमुख विशन राई, निमित्त प्रमुख प्रशासकीय अधिकृत राजकुमार राई, वडाध्यक्ष भगेश्वर राई, नगर कृषि शाखा प्रमुख तेजप्रकाश जैशी,  सामी प्रदेशकी कोअर्डीनेटर उमा पौडेल, वित्तिय साक्षारता प्रमुख मीन आचार्य, प्रशासनिक सहायक जानुका श्रेष्ठ, नेपाली कांग्रेस वडा नं. १३ नुनथलाका सभापति जगवीर तामाङ लगायतले नुनथलामा सञ्चालन भैरहेको मनोपरामर्श  कक्षाको अनुगमन गरिरहनुभएको  थाहा भएको छ । । अनुगमनका क्रममा सञ्चालन भएको अन्तकृयात्मक कार्यक्रममा सामी परियोजनाका संयोजक सन्तोष राई, मनोसामाजिक परामर्श प्रमुख गायत्री तामाङले सहजिकरण गर्नुभएको छ । 

अनुगमनका क्रममा मनोसामाजिक परामर्श कक्षाबाट स्थानीयमा सकारात्मक प्रभाव पर्न थालेको जनाइएको छ । कृषि क्षेत्रलाई आधुनिक प्रविधितर्फ जोड्दै यस पेशा प्रति आकर्षण वढेको पाइएको, जंक फूड र आयातित पेय पदार्थहरु ड्यु, कोक आदिको प्रयोगले स्वास्थ्यमा नकारात्मक असर पर्ने चेतना वृद्धि भैरहेको, समुदायमा फजुल खर्च गर्ने बानीमा सुधार भै मितव्ययिता अपनाउन शुरु भएको, बैदेशिक रोजगारबाट कमाएको रुपिया सुरक्षित गर्ने बानीको विकास भैरहेको जस्ता सवल पक्षहरुको विकास भैरहेको स्थानीय निर्मला तामाङको प्रतिकृया छ । यसैगरी चाँहदा गर्न सकिने रहेछ , तर जाँगर र इच्छा शक्ति आवश्यक छ भन्नुहुन्छ स्थानीय कविता शेर्पा ।

यस्तै वेरोजगार युवाशक्तिलाई स्वेदेशमै रहेर उत्पादनशील क्षेत्रमा लाग्न सिपमुलक तालिम , लगानीका लागि पुजी रकमको व्यवस्थापन जस्ता कामहरुमा सरकारले ध्यान दिनुपर्ने नगरप्रमुख भट्टराईले बताउनुभयो । 

आजै वडा नं. १२ जाल्पामा पनि सामीद्धारा सञ्चालन भैरहेको मनोसामाजिक परामर्श कक्षाको अवलोकन तथा अनुगमन गरिने टोली सदस्य जानुका श्रेष्ठले बताउनुभयो ।