हलेसीन्युजडेस्क, खोटाङ

सामाजिक सञ्जालमा अत्यधिक प्रयोग भैरहेको टिकटक अब नेपालीहरुले प्रयोग गर्न नपाउने भएका छन् । सोमबार बिहान बसेको मन्त्रिपरिषद् बैठकले नेपालमा टिकटक बन्द गर्ने निर्णय गरेपछि अब नेपालीहरु  टिकटकबाट अलगिने भएका हुन् ।

सामाजिक सद्भाव बिगार्ने काम गरेको भन्दै टिकटक बन्द गर्ने निर्णय गरिएको सरकारका प्रवक्ता एवं सञ्चार तथा सूचना प्रविधिमन्त्री रेखा शर्माले जानकारी दिनुभयो ।

टिकटक प्रयोगमा सरकारले प्रतिवन्ध गरिनुलाई कसैले ठीक भनेका छन् भने कतिपयले मानव अधिकारको वाकस्वतन्त्रततासँग जोडेर प्रतिवन्ध नै लगाइहाल्न ठीक नभएको प्रतिकृया दिइरहेकाछन् । बरु यसको यथोचित नियमनकारी भूमिकालाई खोज्नु पर्ने उनीहरुको कथन छ ।

मन्त्री शर्माले नीतिगत रूपमा निर्णयभएसँगै नेपालमा टिकटक बन्द भएको बताउनुभयो ।  उहाँले भन्नुभयो-‘नीतिगत रूपमा आज (२०८० कात्तिक २७ गते सोमवार) दैखि बन्द भयो । प्राविधिक रूपमा कति समय लाग्छ भन्ने कुरा हो । प्राविधिक रूपमा आवश्यक पर्ने व्यवस्था सञ्चार मन्त्रालयले मिलाउनेछ,’ ।

डिजिटल प्रविधिको सर्बपृय माध्यम टिटटकले राजनैतिक व्यक्तित्वहरुको मर्यादामाथि पनि धावा बोल्ने गरेको कारण टिकटक बन्द गरिनु आंशिक कारण भएको कतिपयले धारणा व्यक्त गरेकाछन् । यध्यपि कतिपय टिकटक प्रयोगकर्ताहरुले भिउज बढाउने चाहनामा छाडा र भद्दा भिडियोहरु अपलोड गरिदा सामाजिक  विकृति र विसंगतिहरु बढ्दै गएको कारण यसलाई बन्द गरिनु उचित रहेको भन्ने धारण प्रकट गर्नेहरु पनि प्रसस्त पाइएकाछन् ।

पछिल्लो ४ वर्ष ३ महिनाभित्रमा १ हजार ६ सय ४८ वटा साइबर अपराधका उजुरी दर्ता भएकोमा अधिकांश टिकटकसँग सम्बन्धित भएको तथ्यांक छ ।

फेक एकाउन्ट खोलेर जसले जसलाई जे पनि गर्न सक्ने र बदनाम गराउने सामग्रीलाई स्वतः हटाउने कुनै संयन्त्र टिकटकमा छैन । केही देशले टिकटकलाई प्रतिबन्ध नै लगाएका छन् भने अमेरिका, फ्रान्ससहित ५० भन्दा बढी विकसित देशले यसको नियमनका लागि कदमहरू चालेका छन् ।