हलेसीन्युजडेस्क, खोटाङ

प्रदेश सभाबाट गएको फागुन १७ गते प्रदेश नं.१ को नाम कोशी राखिएसँगै पहिचानवादीहरुले शुरु गरेको आन्दोलनले अब वार्ताको चरण प्रवेश गरेको छ । कोशी प्रदेश सरकार र पहिचानवादीबीच आज  प्रदेश राजधानी विराटनगरस्थित बिग होटेलमा पहिलो पटक वार्ता प्रारम्भ भएको छ ।

पहिचानवादीहरुको कोशी नाम खारेज गरेर पुनः नाम सच्याउने मागसहित भएको  आन्दोलनका क्रममा एकजनाको ज्यान समेत गैसकेको छ । गत चैत्र ५ गते विराटनगरमा भएको आन्दोलनका क्रममा पदमलिम्वु लाजेहाङ सख्त घाइते भै उपचारकै क्रममा चैत्र १० गते उनको निधन भएको थियो । त्यस्तै  कैयौँ घाइते बनेका छन् । सरकारको संरचनामा समेत फेरबदल भएको छ । 

पूर्ववत् गठबन्धनबाट जसपा र माओवादी केन्द्र बाहिरिएसँगै नेकपा एमाले र राप्रपा सम्मिलित सरकार अलपमतमा परेको  छ । यही सरकारले पहिचानवादीसँग वार्ता गर्न सरकार पक्षबाट गत जेष्ठ २४ गते सिँचाइ, खानेपानी तथा स्वास्थ्यमन्त्री तिलकुमार मेयाङबोको संयोजकत्वमा उद्योग, कृषि, सहकारी तथा पूर्वाधारमन्त्री भक्तिप्रसाद सिटौला र सामाजिक विकासमन्त्री बुद्धिकुमार राजभण्डारी रहेको वार्ता समिति गठन गरेको थियो ।

यस्तै सरकारले वार्ताको आह्वान गरेपछि आइतबार पहिचान पक्षधरले पनि वार्ता समिति बनाएको थियो  । पहिचान पक्षधरबाट बनाइएको वार्ता समिति सदस्यमा गोबिन्द आङ्बुङ, युवराज राई, रामभक्त कुरुम्बाङ, लाक्पा शेर्पा, गेल्जे शेर्पा, कुमार लिङ्देन, रमेश राई, कृष्ण चोङ्बाङ, प्रेम मिभक र पदम जवेगु हुनुहुन्छ । उहाँहरु विभिन्न पार्टी र जातीय संघ संस्थासँग सम्बद्ध हुनुहुन्छ ।

 यतिखेर सरकार र पहिचान पक्षिधरवीच पहिलो पटक वार्ता प्रारम्भ भएको हो ।