हलेसीन्युजडेस्क, खोटाङ

खोटाङको ऐसेलुर्खक गाउँपालिकाको  सामुदायिक वनमा गत शुक्रवारदेखि लागेको डढेलो फैलिई नजिकै वस्तिमा रहेको घर तथा गोठहरु जलेर क्षति पुगेका परिवारहरुलाई राहत उपलव्ध गराइएको छ । ऐसेलुखर्क गाउँपालिका–६ ज्यामिरे सल्लेको सामुदायिक वनमा लागेको डढेलो फैलिएर स्थानीय खुजप्रसाद फुयाल र बुद्धिनाथ लम्सालको घर तथा घरमा रहेको लत्ता कपडा, अन्नपात लगायत घरेलु चौपाया समेत जलेर क्षति पुगेको हुँदा पीडित परिवारहरुलार्ई आज राहत रकम तथा बिभिन्न सामाग्रीहरु उपलव्ध गराएको हो । 

                   आगलागीबाट जलेका घरहरु

वनमा लागेको डढेलो फैलिदै चैत्र ३ गते स्थानीय खुजप्रसाद फुयालको तीनतले घर, घरभित्र रहेको खाद्यान्न, लत्ताकपडा, कागजपत्र, ६० वटा खसीवाख्रा जलेर नष्ट  भएको थियो । सोही डढेलोले युवराज राईको गाईगोठ, भाडाकुडा, काटेर राखेको काठ, जस्तापाता जलेर नष्ट भएको  थियो र बुद्धिनाथ लम्सालको खरको छानो भएको तीनतले घर, घरभित्र रहेकोे भाडाकुडा, लत्ताकपडा, १५ वटा कुखुरा सहितको फर्म जलेर नष्ट हुँदा आश्रयविहिन बन्न पुगेका परिवारहरुलार्ई  आज राहत रकम तथा बिभिन्न सामाग्रीहरु घटनास्थलमै पुगेर बितरण गरिएको नेपाल रेडक्रस सोसाइटी जिल्ला शाखा खोटाङका मन्त्री छत्रकुमार वजिमयले हलेसी एफएमलाई बताउनुभयो । 

उहाँका अनुसार खुजप्रसाद फुयाल र बुद्धिनाथ लम्सालको परिवारलार्ई जिल्ला विपद व्यवस्थापन कोषबाट जनही रु.१५/१५ हजार राहत रकमका साथ रेडक्रस शाखाबाट दुवै परिवारलाई त्रिपाल १/१ थान, कम्वल २/२ वटा, म्याट्रेस १/१वटा, साडी २/२ थान, भाडाकुडा एक/एक सेट, वाल्टी १/१ वटा, प्रिन्ट कपडा ७/७ मिटर, सादा कपडा साढे ३/३ मिटर, सुटिङ कपडा ४/४ मिटर, डोरी एक/एक मुठा, बोरा १/१ वटा, झुल १/१ वटा उपलव्ध गराइएको छ । सोही ठाउँका युवराज राईको गोठमात्र जलेर नष्ट भएको कारण पाल १ वटा, कम्बल १ वटा र १ मुठा डोरी उपलब्ध गरार्ईएको रेडक्रस शाखाका मन्त्री वजिमयले बताउनुभयो ।

राहत हस्तान्तरण कार्यक्रममा प्रमुख जिल्ला अधिकारी पवित्रप्रकाश शाह, रेडक्रस शाखाका मन्त्री छत्रकुमार बजिमय, जिल्ला प्रशासनका कर्मचारी सञ्जिब आचार्य, ऐसेलुर्खक गाउँपालिकाका वडानं.६ का वडाध्यक्ष सुनिल रार्ई सँगै स्थानीय जनप्रतिनिधिहरुको उपस्थिति रहेको थियो ।

[यो पनि पढ्नुहोस--बतासेका आगलागी पीडित परिवारहरुलाई घरैमा पुगेर राहत सहयोग प्रदान}