हलेसीन्युजडेस्क, खोटाङ /

खोटाङको हलेसीतुवाचुङ नगरपालिका वडा नं. ८ धितुङले वडाका किसानहरुलाई बाँदर भगाउने यन्त्र दिएको छ ।  खेत बारीमा लगाएका बालिनाली तथा अन्न पातहरुलार्ई  बाँदरले सखाप बनाएर हैरान बनाएपछि किसानहरुको मर्कालाई ध्यानमा राखि बाँदर भगाउन बन्दुकजस्तै आवाजमा पड्किने यन्त्र झिकाई वडाका किसानहरुलाई वितरण गरिएको वडाध्यक्ष टेकराज राईले बताउनुभयो ।

ग्रामिण भेगका किसानहरु बाँदरको अतिक्रमणबाट वर्षेनी प्रताडित हुने गरेकाछन् । बाँदर नियन्त्रणका लागि सरकारको तर्फबाट पनि प्रभावकारी उपाय किसानले पाउन सकिरहेका छैनन् । बाँदरकै ज्यादतिका कारण गाउँका वस्तिहरु वर्षेनी रित्तिदै आइरहेको छ । बसााई जान पनि नसक्ने अवस्थामा रहेका किसानहरुलाई बाँदरको ज्यादतिबाट राहत मिल्ने आशामा यस अगाडि जन्तेढुङ्गा गाउँपालिकाले पनि बाँदर धपाउने यन्त्र झिकाएर किसानहरुलाई वितरण गरिसकेको छ ।

हलेसीतुवाचुङ नगरपालिका -८ धितुङले पनि बाँदर धपाउन कुनै उपाय नभएपछि हाल यही यन्त्र झिकाएर किसानको हातमा दिइएको वडाध्यक्ष राई हलेसी एफएमलाई बताउनुहुन्छ ।

वडाध्यक्ष राईका अनुसार  वडामा  विनियोजित बजेटबाट किसानहरुको सझाव, सल्लाह र मागका आधारमा राष्ट्रिय आविष्कार केन्द्रबाट वडाभरिका लागि ९ थान यन्त्र झिकाएको हो । आज वडा कार्यालयमा किसानहरुको उपस्थितिमा वडा नं. ८ धितुङका साविक ९ वडाहरुका लागि १/१ वटा बाँदर भगाउने यन्त्र उपलव्ध गराइएको थियो ।

बन्दुक जस्तो आवाज दिने भए पनि यसलाई बन्दुकको नामबाट नबुझ्न र यसको विशेष नाम राखि नसकिएको हुँदा वादर धपाउने यन्त्र भनेर बुझिदिन सर्व साधारणलाई राष्ट्रिय आविष्कार केन्द्रका अध्यक्ष महावीर पुनले  सुझाउदै आउनुभएको छ ।