धान दिवसकै अवसरमा किसानसँग कांग्रेस अभियानलाई पुनः व्युताइयो

हलेसीन्युजडेस्क, खोटाङ /

नेपाली कांग्रेस खोटाङले पनि किसानसँग कांग्रेस अभियानलाई पुनः निरन्तरता दिदै असार १५ मा धान दिवस मनाएको छ । कांग्रेसको भातृ संस्था नेपाल किसान संघ खोटाङको आयोजना तथा सम्पूर्ण भातृ संस्थाहरुको सहभागितामा नेपाली कांग्रेस खोटाङले असार १५ गते शनिवार दिक्तेल रुपाकोट मझुवागढी नगरपालिका वडा नं. ६ नेर्पास्थित कविता चौहान वास्तोलाको खेतमा धान रोपाई गरेर राष्ट्रिय धान दिवस मनाएको हो । 

विगतमा नेपाली कांग्रेस खोटाङले असार १५ मा किसानको खेतमा धान रोप्दै किसानसँग कांग्रेस अभियानको उद्घाटन गरेर श्रावण ६ गते वीपी स्मृति दिवसका अवसरमा वृक्षारोपण गर्दै समापन गर्ने परम्पराको शुरु गरेको थियो । त्यसवीचमा किसानको घर घरमा पुगेर किसानहरुको मर्का र पीडालाई बुझ्ने, किसानहरुको खेतमा सघाउने, सिँचाई कुलोहरु मर्मत गर्न सघाउने, उजाड भूमिमा वृक्षारोपण गर्ने तथा किसानहरुका लागि खोलिएको सरकारी कार्यालय र संघ संस्थाहरुमा गएर किसानहरुको तर्फबाट छलफल, वहस र किसानका मर्काका विषयमा वकालत गर्ने कामहरु गरिन्थे । तर वीचमा राजनैतिक प्रतिकूलता र कोरोना कहरका कारण अभियान स्थगित रहेको थियो । यो वर्षदेखि पुनः किसानसँग कांग्रेस अभियानलाई व्युँत्याईएको खोटाङ कांग्रेसका जिल्ला सदस्य एवं प्रवक्ता रोजन राई बताउनुहुन्छ ।

शनिवार मध्यान्ह १२ वजेदेखि नेपाली कांग्रेस खोटाङ र नेपाल किसान संघ खोटाङको संयुक्त व्यानर राखेर आयोजना गरिएको धान रोपाईमा महिला संघ खोटाङका दिदी बहिनीहरु छुपुछुपु धान रोपिरहेका देखिन्थे भने नेपाल तरुण दल, नेवि संघका भाईहरु गोरु धपाउदै खेत हिल्याउने काममा खटिरहेका देखिन्थे । नेपाली कांग्रेसका नेता कार्यकर्ताहरु निधारबाट पसिना तर्काउदै कोदाली मच्याइरहेको दृष्य साँच्चि नै लोभलाग्दो देखिन्थ्यो । 

करिव १० पाथीको विउ जाने नेर्पास्थित मोहोरिया पराजुली गाउँमा रहेको खेत नै धान दिवसका दिन रोज्नु पर्ने कारण खेतका धनी कविता चौहान वास्तोला एकल महिला भएको र उहाँको सासु पनि असक्त रहेको, बालबच्चाहरु साना साना भएको हुँदा यो अभियानले उहाँलाई पनि सहयोग पुग्ने उद्धेश्यले यहाँ धान दिवस मनाईएको प्रवक्ता राईले खुलासा गर्नुभयो ।

‘आफूले यसरी सहयोग पाउँला र यसपालिको खेती उतारौँला भन्ने कल्पनामा पनि सोँचेकी थिइन । ठूलो राहत मिल्यो, उहाँहरुलाई भगवानले कल्यान गरुन् ।’–भावूक बन्दै खेतका धनि कविता चौहान वास्तोलाले हलेसी एफएमका सुनिल श्रेष्ठसँग कुराकानी गर्दै धान रोपाईमा सहभागी सबैको प्रशंसाा गर्नुभयो ।

शैक्षिक अभियन्ता तथा कांग्रेसका अग्रज पवन थापाको प्रमुख आतिथ्यतामा भएको धान दिवस कार्यक्रममा नेपाली कांग्रेसको प्रबक्ता रोजन राई, संगठन बिभाग प्रमुख बिष्णुराज राई, कांग्रेसका महसमिति सदस्य शहरमान राई, महासमिति सदस्य देवी राई, महासमिति सदस्य एवं नेपाल तरुण दलको कन्द्रिय सदस्य भिषण राई, जिल्ला कार्य समति सदस्य मिना कार्की, महिला नेतृ अन्जना बस्नेत केसी, निर्वाचन क्षेत्र प्रदेश सभा (क) का क्षेत्रिय उपसभापति परशुराम तामाङ, निर्वाचन क्षेत्र प्रदेश सभा (क) का क्षेत्रीय सचिव राजन भट्टराई, नेवि संघ केन्द्रिय सदस्य रुपन राई, नेपाल किसान संघ खोटाङका सभापति देवराज घिमिरे, नेपाल विध्यार्थी संघका जिल्ला अध्यक्ष मोतिचन्द्र राई,  तरुण दल जिल्ला सदस्य विरेन गुरुङ, नेबिसंघ जिल्ला सदस्य प्रतीक आचार्य, बाम्राङ कांग्रेस वडा सभापति सन्तोष कार्की, तरुण दल दिक्तेल रुपाकोट मझुवागढी नगरकार्य समिति अध्यक्ष दिवासन राई, नेपाली कांग्रेसका तर्फबाट नेर्पाका वडाध्यक्षका उम्मेदवार हरि राई, उध्योग बाणिज्य संघ पूर्व जिल्ला सदस्य निरकुमार रसाइली, सञ्चारकर्मीहरु नेपाल प्रेस युनियनका अध्यक्ष उत्तम चौलागाई, समायोजनखवरका चिसाङ शेर्पा, हलेसी एफएमका सुनिल श्रेष्ठ लगायत स्थानीय नेपाली कांग्रेस आवद्ध ५० जना भन्दा बढी नेता कार्यकर्ताहरुको सहभागिता रहेको थियो ।

धान दिवसमा सहभागीहरुले गाउँको शुद्ध दहि चिउरा खाँदै वेला वेला असारे गीत घन्काउदै रमाइलो गरेका थिए ।

           नेर्पास्थित धान दिवसमा रोपाईका केही झलकहरु

p

[ यो पनि-आज असार १५ ! दहिचिउरा खाँदै खेतमा धान रोप्ने मुख्य दिन ]