हलेसीन्युजडेस्क, खोटाङ

धरानबाट आएको पर्यटक टोलिबाट दिक्तेलरुपाकोट मझुवागढी नगरपालिका वडा नं. १ स्थित प्रशिद्ध धार्मिक एवं पर्यटकीय स्थल मझुवागढी तथा मझुवा कालिका देविस्थान (फूलको पहाड)को अहिले दर्शन/अवलोकन भैरहेको छ । चोमोलुङ्मा राइड २०२३ नाम दिईएर पहाडि जिल्ला तर्फ पर्यटकीय यात्रामा धरानबाट निस्किएको रोयल इस्टर्न ईन्फिल्डर्स मोटरसाइकल क्लव धरानको टोलि बुधवार साँझ दिक्तेल वजार आइपुगी अहिले विहान यहाँको प्रशिद्ध धार्मिक पर्यटकीय स्थल मझुवागढी तथा कालिका भगवती देविस्थान अर्थात फूलको पहाड अवलोकन मा सरिक भैरहेको नगरपालिका श्रोतले जनाएको छ । 

जिल्लाको धार्मिक, साँस्कृतिक र पर्यटकीय क्षेत्रको प्रवद्र्धन गर्ने उद्धेश्यले गत अशोज १७ देखि २१ गतेसम्म दिक्तेलमा आयोजना गरिएको मुन्दुम अन्तर्राष्ट्रिय चित्रकला कार्यशाला तथा कला प्रदर्शनीको चर्चा सुनेर यो टोलिलाई खोटाङको यी क्षेत्र आउने हुटहुटी जागेको बताईन्छ ।

टोलि नेता मनिश शाहीको अगुवाईमा दिक्तेलवजार आइपुगेको २८ जनाको पर्यटक टोलिलाई आज विहान दिक्तेल हाटडाँडामा दिक्तेल रुपाकोट मझुवागढी नगरपालिकाले स्वागत/सम्मान गरी मझुवागढी तथा देविस्थानको दर्शन अवलोकन गराइरहेको छ । पूर्वबाट दिक्तेल वजार आइपुगेको गन्धर्वहरुबाट सो अवसरमा मिठो सांगितिक प्रस्तुति समेत रहेको थियो । 

नगरप्रमुख तीर्थराज भट्टराई लगायत अन्य जनप्रतिनिधि नगरपालिकाका कर्मचारी तथा स्थानीयवासीको अगुवाईमा टोलिलाई गढी तथा देविस्थान अवलोकन गराउने कार्य विहान ८ वजेदेखि शुरु भएको र ९ वजेपछि त्यहाँबाट फर्किने जनाइएको छ । नेर्पास्थित भुलभुले क्षेत्रको अवलोकन गर्दै टोलि आजै भोजपुरतर्फ प्रस्थान हुने थाहा भएको छ । यसरी दिक्तेल रुपाकोट मझुवागढी नगरपालिकाका महत्वपूर्ण स्थानहरुलाई स्वदेश तथा विदशेमा चिनाएर पर्यटन क्षेत्रको विकास र प्रवर्द्धन गर्न सके यसबाट नगरपालिका आर्थिक, सामाजिक, साँस्कृतिक र भौतिक रुपमा पनि सवल एवं सुदृढ हुने नगरप्रमुख भट्टराईले हलेसी एफएमलाई बताउनुभयो।

सन २०१२ मा स्थापना भएको रोयल ईन्फिल्डर्स मोटरसाकइल क्लव धरानले सडक दुर्घटना न्युनिकरण गर्न ट्राफिक, चेतना, पर्यटन प्रवर्द्धन, लागू औषध दुर्व्यसन न्युनिकरण सम्बन्धि सचेतना फैलाउन भूमिका खेल्दै आएको छ ।