हलेसीन्युजडेस्क, खोटाङ

खोटाङको दिक्तेलरुपाकोट मझुवागढी नगरपालिकाको तीन वडामा साप्सुखोलाको पानी निकालेर वितरण गर्ने गरी लिफ्टिङ खानेपानी योजनाको काम तिब्र गतिमा अगाडि बढिरहेको छ । वडा नं ३ बाम्राङ, वडा नं ४ खाल्ले र वडा नं ५ लफ्याङमा खानेपानीको सुविधा विस्तार गर्ने उद्देश्यले मेवा दोभान–साप्सु कालिका देवीस्थान लिफ्टिङ खानेपानी योजनाको निर्माण कार्य हाल सम्म ६१ प्रतिशत सम्पन्न भैसकेको मेवा दोभान–साप्सु कालिका देवीस्थान लिफ्टिङ खानेपानी योजना उपभोक्ता समितिका अध्यक्ष ललितकुमार राईले हलेसी एफ एमलार्ई जानकारी दिनुभएको छ ।

वि.सं.२०७९ साल साउन २२ गते सम्झौता गरी साप्सुखोलाको पानी करिव २ हजार मिटरमाथि रहेको पर्यटकीयस्थल दिक्तेल रुपाकोट मझुवागढीस्थित देवीस्थानमा निकालेर खाल्ले, बाम्राङ र लाफ्याङका  दुई हजार तीन सय ८२ घरधुरीलाई वितरण गर्ने गरी लिफ्टिङ खानेपानी योजनाको काम सुरु गरिएको थियो । 

सङ्घीय खानेपानी तथा ढल व्यवस्थापन आयोजनाको कार्यालय खोटाङमार्फत रु ५४ करोड ६७ लाख ९० हजार सात सय १६ मा मृत सञ्जिवनी–सगरमाथा जेभी काठमाडौँले लिफ्टिङ खानेपानी योजनाको ठेक्का लिएर काम अगाडि बढाइएको उपभोक्ता समिति अध्यक्ष राईले बताउनुभयो । उहाँका अनुसार निर्माण कम्पनीले वि.सं. २०८२ भदौ ४ गतेसम्ममा काम सम्पन्न  गर्नु पर्नेछ ।

खानेपानीको बढ्दो समस्या समाधान गर्नका लागि खोलाको पानी निकाल्ने योजना सुरु गरिएको दिक्तेल रुपाकोट मझुवागढी नगरपालिकाका प्रबक्ता एबं दिक्तेल रुपाकोट मझुवागढी नगरपालिका वडा नम्बर ५ लफ्याङका वडाध्यक्ष दिनेश कुमार घिमिरेले जानकारी दिनु भएको छ ।

लिफ्टिङ खानेपानी योजनाअन्तर्गत ६१ वटा आरभिटी ट्याङ्की, एउटा ट्रिटमेन्ट प्लान्ट, एउटा कार्यालय भवन, एउटा सम्पवेल, सातवटा गार्ड हाउस लगायतका संरचना मध्ये ६१ प्रतिशत काम भैसकेको र एक सय तीन किलोमिटर वितरण पाइप लाइन र खोलाबाट पाँच हजार एक सय ट्रान्समिसन लाइनको काम भैसकेको निर्माण कम्पनीका इञ्जीनियर हरिदेवकिशोर रजकले जानकारी दिनु भएको छ  । उहाँ भन्नुहुन्छ–‘अब बाम्राङ र खाल्लेमा  पार्ईप बिछ्याउने काम बाँकी छ । अहिले लफ्याङमा  पार्ईप लार्ईन  बिछ्याउने काम भैरहेको छ ।’  

निर्माण कम्पनीले वि.सं. २०७९ भदौ ५ गतेदेखि काम सुचारु गरेर निर्धारित समयमा काम सम्पन्न गर्न युद्धस्तरमा काम भैरहेको जनाइएको छ ।